Beynəlxalq akademik icma Bəhruz Səmədovun azad edilməsinə çağırır

Beynəlxalq akademik icma azərbaycanlı gənc alim Bəhruz Səmədovun həbsindən dərin narahatlıq ifadə edir və onun dərhal azadlığa buraxılmasına çağırır.

Avqustun 21-də saxlanılan və barəsində 4 aylıq həbs qətimkan tədbiri seçilən siyasi tədqiqatçı, Karlov Universitetinin doktorantı Bəhruz Səmədov dövlətə xəyanətdə ittiham olunur.

“Biz Səmədovun həbsindən və dövlətə xəyanətdə ittiham olunmasından dərin narahatıq. Biz bunu Cənubi Qafqazda davam edən sülh quruculuğu səylərini boğmaq, zorakılıq və müharibəyə qarşı çıxan tənqidi səsləri susdurmaq cəhdi kimi başa düşürük. Biz bunu qəbuledilməz və hökumətin sülhə doğru irəliləyişlə bağlı diskursuna zidd hesab edirik”, - bəyanatda vurğulanır.

Bəyanata imza atanlar həmçinin Azərbaycanda son vaxtlar digər tədqiqatçıların, fəalların və jurnalistlərin artan həbsindən narahatlıq ifadə edir, Avropa Jurnalistlər Federasiyasının (EFJ) və PEN Amerikanın BMT-nin İqlim Dəyişikliyi Konfransı (COP29) ərəfəsində Azərbaycanda haqsız yerə həbs edilmiş 23 jurnalist və media işçisini azad etməyə dair çağırışına qoşulduqlarını bildirirlər.

“Bu məktubla biz Azərbaycan hökumətini Bəhruz Səmədovu və Azərbaycanda olan digər siyasi məhbusları dərhal həbsdən azad etməyə və onların insan hüquqlarına hörmət etməyə çağırırıq”, - müəlliflər vurğulayırlar.

Açıq məktubda Çexiya hökuməti və Avropa İttifaqı Bəhruz Səmədov və digərlərinin həbsdən azad edilməsi üçün səyləri artırmağa, COP29 Beynəlxalq Məşvərət Komitəsi və konfrans iştirakçıları noyabrda Bakıya səfər edərkən həbsdə olan azərbaycanlı tədqiqatçıların, fəalların və jurnalistlərin həbsini gündəmdə saxlamağa çağırılır.