Bilal Ərdoğana çağırış vərəqi göndərə biləcək prokuror qalmayıb

Türkiyə baş nazirinin oğlu Bilal Ərdoğanın vəkili prokurorluq çağırışı olarsa B.Ərdoğanın ifadə verməyə gedəcəyini söyləyib.

Vəkil Əhməd Özel İstanbul prokurorluğunda 2013-cü il dekabrın 25-də başlanan araşdırma ilə bağlı hər hansı çağırış dəvətinin olmamasına diqqət çəkib.

Parlamentdə və bir sıra media orqanlarında B.Ərdoğanın korrupsiya və rüşvətə  bulanması haqda açıqlamaları vəkil siyasi məqsədli açıqlamalar adlandırıb.    

Xatirladaq ki, 2013-cü il dekabrın 17-də və 25-də İstanbulda “korrupsiya və rüşvət əməliyyatı” keçirilib. Bu əməliyyatda bir neçə keçmiş nazirin övladları, iş adamları, bank rəhbərləri saxlanılıb. Bu əməliyyatda B.Ərdoğanın da adı keçib. Amma o, istintaqdan kənar saxlanılıb.

Elə həmin əməliyyatdan sonra bütün Türkiyə boyu polislərin, prokuror və hakimlərin kütləvi şəkildə yerlərinin dəyişdirilməsinə, işdən azad olunmaları prosesinə başlanıb və indi də davam edir. Bununla kifayətlənməyən Ərdoğan hökuməti hakim və prokurorların birliyi olan Hakim-Prokurorlar Ali Şurasının yeni fəaliyyətini müəyyən etmək üçün qanun layihəsini parlamentdə qəbul etdirməyə çalışır. Layihəyə baxışla bağlı hakim və müxalif parlamentarilər arasında dəfələrlə əlbəyaxa vuruşmalar olub. -05D-