Bişkek Bakının qınağına cavab verib

 Qırğızıstan Xarici İşlər Nazirliyi bu ölkənin İqtisadi Əməkdaşlıq Təşkilatının (İƏT) İslamabad bəyannaməsinin siyasi bəndlərinə qoşulmaması ilə bağlı Azərbaycanın xarici siyasət idarəsinin reaksiyasını təəssüflə qarşılayıb. Bu barədə Qırğızıstan XİN-in saytında dərc edilən bəyanatda deyilir.

Bundan öncə Azərbaycan Prezident Administrasiyasının nümayəndəsi Novruz Məmmədov Qırğızıstanın İqtisadi Əməkdaşlıq Təşkilatının İslamabad bəyannaməsinin  bəndləri ilə bağlı mövqeyindən təəccübləndiyini bildirib və tənqid edib. Belə ki, həmin bəndlərdə İƏT iştirakçısı olan ölkələrin ərazi bütövlüyünün dəstəkləndiyi bildirilir.

“Hesab edirik ki, bu regional birlik ilk növbədə iqtisadi məsələlərin həllinə yönəlib. Bununla əlaqədar nümayəndə heyətlərinin əksəriyyəti həm təşkilatın özünü, həm də İslamabad bəyannaməsini siyasiləşdirməməyə tərəfdar olub.  Qırğızıstan bəyanatın qəbuluna mane olmayıb, sadəcə, onun siyasi bəndlərini təqdir etməyib”, - Qırğızıstan XİN-in bəyanatında deyilir.

Qırğızıstan Respublikası Azərbaycan Respublikası ilə həm ikitərəfli qaydada, həm də çoxtərəfli formatda ardıcıl olaraq ərazi mübahisələrinin beynəlxalq hüquq norma və prinsipləri, o cümlədən diplomatik əlaqələr qurduğu hər dövlətin suverenliyi, müstəqilliyi, ərazi bütövlüyü  əsasında dinc yolla nizamlanmasına tərəfdardır.

Qırğızıstan bundan sonra İƏT üzvləri, eləcə də Azərbaycanla qarşılıqlı əlaqələri möhkəmləndirmək və genişləndirməkdə maraqlıdır, bəyanatda bildirilir. 06D--