BJMK hakimiyyəti Sərdar Əlibəylini azad etməyə çağırıb

Beynəlxalq Jurnalistləri Müdafiə Komitəsi (BJMK) Azərbaycan hakimiyyətini “PS Nota” qəzetinin baş redaktoru Sərdar Əlibəylini azad etməyə çağırıb.  O, xuliqanlıqda ittiham olunaraq 4 il müddətinə azadlıqdan məhrum edilib.

“Biz Azərbaycan hakimiyyətini jurnalist fəaliyyətinə görə dəfələrlə həbs olunan Sərdar Əlibəylini azad etməyə çağırırıq”, - təşkilatın Avropa və Mərkəzi Asiya proqramı üzrə koordinatoru Nina Oqnyanova bildirib. 

Noyabrın 13-də Xətai Rayon Məhkəməsi S.Əlibəylini 4 il müddətinə məhkum edib. Lakin jurnalist ittihamları rədd edir və hökmdən şikayət vermək niyyətindədir.

Məhkəmədə S.Əlibəyli bildirib ki, jurnalist fəaliyyətinə, əsasın “22 iyul – azad və milli mətbuatın son günü” məqaləsinə görə təqib olunur. Məqalədə o, mətbuatın acınacaqlı durumu haqda yazıb və yüksək vəzifəli  şəxsləri mətbuatın düşmənləri adlandırıb.

S.Əlibəyli prezident İlham Əliyevi və onun administrasiyasını dəfələrlə tənqid edib, həmçinin  Facebook-da İ.Əliyevin əlləri qandallı vəziyyətdə təsvir edən kollaj verib.  

BJMK  diqqəti ona yönəldir ki, Azərbaycanda söz azadlığının pisləşməsi şəraitində rəsmi Bakı 2014-cü ildə Avropa Şurası Nazirlər Kabinetində sədrliyi öz üzərinə götürməyə hazırlaşır. Bununla əlaqədar Avropa Şurası Azərbaycan Nazirlər Kabinetində nüfuzlu mövqe tutana qədər öz üzvünü söz azadlığı sahəsində vəziyyətin yaxşılaşdırılmasına sövq etməlidir. —0—