Blinken: "Biz istəyirik ki, Ukrayna qalib gəlsin"

Çərşənbə günü ABŞ Ukraynaya əlavə 700 milyon dollarlıq humanitar yardımı elan edərək bildirib ki,  Amerika istəyir ki, Ukrayna nəinki özünü müdafiə edə bilsin, həm də gələcəkdə möhkəm dayana bilsin, Turan-ın Vaşinqton müxbiri bildirib.

"Biz istəyirik ki, Ukrayna qalib gəlsin", - Blinken Kiyevdə Ukrayna rəhbərliyilə danışıqlardan sonra bildirib.  "Və biz onun cəsur müdafiəçilərinə və vətəndaşlarına lazım olan dəstəyi davam etdirməyə tam sadiqik", - o əlavə edib.

Bu addım Ukrayna  rəsmi şəxslərinin Qərbin verdiyi raketlərdən Rusiyanın dərinliklərində yerləşən hədəflərə qarşı istifadə etmək çağırışlarını bərpa etdikdən sonra atılıb. Blinken deyib ki,  bu mövzunu prezident Vladimir Zelenski ilə müzakirə edib və Vaşinqtonda prezident Baydenlə müzakirələri davam etdirəcək.

Blinken əlavə edib: "Bizim mesajımız, Putinə kollektiv müraciətimiz aydındır: bizim dəstəyimiz zəifləməyəcək; birliyimiz pozulmayacaq. Putin Ukraynanı dəstəkləyən Qərb koalisiyasını məğlub edə bilməyəcək və Ukrayna xalqının əlindən qurtula bilməyəcək".

Dövlət Departamentinin informasiya bülleteninə görə, yeni yardım paketinə Ukraynada enerji infrastrukturunun bərpası üçün 325 milyon dollar, humanitar yardım üçün 290 milyon dollar və minalardan təmizləmə probleminin həllinə 103 milyon dollardan çox vəsait daxildir.