BQXK Ermənistanda saxlanılan azərbaycanlılara və Azərbaycanda saxlanılan ermənilərə baş çəkib

Bakı/28.11.23/Turan: Noyabr ayında Beynəlxalq Qızıl Xaç Komitəsinin (BQXK) əməkdaşları Azərbaycan tərəfinin haqqında məlumat verdiyi erməni əsilli şəxslərə və Ermənistanda saxlanılan azərbaycanlılara yenidən baş cəkib. Saxlanılan şəxslərlə təkbətək görüşlər keçirilib və onların ailələri ilə əlaqə yaratmaları üçün şərait yaradılıb. Bu barədə BQXK-nın Azərbaycan nümayəndəliyinin ictimaiyyətlə əlaqələr şöbəsinin rəhbəri İlahə Hüseynova bildirib.

“Mandatına uyğun olaraq, BQXK bu cür başçəkmələr zamanı saxlanılan şəxslərlə rəftarı və saxlanma şəraitini qiymətləndirir. BQXK həmçinin şəxslərin ailələri ilə əlaqələrini bərpa etmək və ya davam etdirmək üçün şərait yaradır. BQXK-nın prosedurlarına uyğun olaraq, başçəkmələrlə bağlı müşahidələr və tövsiyələr yalnız saxlayan tərəflə paylaşılır və müzakirə edilir”, deyə Hüseynova qeyd edib.

Xatırladaq ki, Ermənistanda Azərbaycanın iki hərbçisi, Azərbaycanda isə, yerli mediada dərc olunan məlumatlara görə, onlarla erməni əsilli insan saxlanılır. 03