Bu dəfə Roqozini Bakıda o qədər də səmimi qarşılamayıblar

Bu gün Bakıda Azərbaycan və RF arasında iqtisadi əməkdaşlıq üzrə hökumətlərarası komissiyanın növbəti iclası açılıb.

 "Biz danışıqlara çox vaxt itirdik, mürəkkəb müzakirələrə səbəb olan bir sıra məsələləri çıxardıq", deyə RİA agentliyi komissiyanın Rusiya tərəfdən sədri, baş nazirin müavini Dmitri Roqozindən sitat gətirir.

Komissiyanın Azərbaycan tərəfdən sədri, baş nazirin müavini Yaqub Eyyubov öz növbəsində bildirib ki, "Rusiya təkcə iqtisadi tərəfdaş deyil, həm də regionun təhlükəsizliyinin qarantıdır. Rusiya çalışır ki, hər yerdə sülh olsun, ölkələrin daxili işlərinə müdaxilə olmasın".

Qeyd edək ki, iclas ərəfəsində Moskvadakı mənbələr "Kommersant" qəzetinə Roqozinin İlham Əliyevə Bakının kəskin narazılığına səbəb olan Ermənistana "İsgəndər" raketlərinin ixracının səbəbləri haqqında məlumat vermək üçün bir gün əvvəl Bakıya gedəcəyi barədə məlumat sızdırıb.

Lakin İlham Əliyev Roqozini qəbul etməyib və hələlik Rusiya nümayəndə heyəti yalnız birgə komissiyanın üzvləri ilə görüşə bilib. Çox güman ki, Əliyevin Roqozinlə görüşü komissiyanın iclası başa çatdıqdan sonra keçiriləcək və əvvəllər olduğu kimi səmimi görüş olmayacaq, formal xarakter daşıyacaq. -02D-