Cəmil Həsənli: Əliyev ölkə Konstitusiyasını təhrif etməyə davam edir (YENİLƏNİB)

Hakimiyyət hələ 1918-ci ildə əsası qoyulmuş respublika dəyərlərini məhv edən kommunist cəmdəyinin varisi olduğunu bir daha göstərdi, bu barədə Milli Şuranın lideri Cəmil Həsənli öz çıxışında bildirib.

23 il ərzində dövlət, hakimiyyət ölkənin əsas problemlərindən birini belə həll etməyib, yalnız öz ailə hakimiyyətini əbədiləşdirmək cəhdləri ilə məşğuldur. “Biz Konstitusiyaya düzəlişlərə qarşıyıq. Əliyev düşünür ki, bu düzəlişlər onun əmin-amanlığına və ömürlük hakimiyyətinə zəmanət verir. Amma ölkənin taleyi orada deyil, meydanlarda həll olunacaq, narazı xalq repressiyalara və təqiblərə baxmayaraq öz sözünü deyəcək!”, deyə Həsənli qeyd edib.

O, hakimiyyətin Milli Şuranın xarici qüvvələrə işləməsi haqqında ittihamlarını qətiyyətlə təkzib edib.

“Biz, hakimiyyətdən fərqli olaraq, xalqımıza xidmət edirik”, deyə o bildirib.

İştirakçılara siyasi məhbus, ilahiyyatçı Taleh Bağırzadənin hakim rejimə qarşı mübarizə aparmaq çağırışı yer alan müraciəti oxunub.

Həmçinin bildirilib ki, hakimiyyət yeganə müxalif “Azadlıq” qəzetini sındıra bilməyib, 2 həftəlik fasilədən sonra qəzet nəşrini bərpa etdirəcək.

Bununla da aksiya başa çatıb. -02В-

* * *

Bu gün ölkənin bir çox rayonlarında polis Bakıya mitinqə gedən yüzlərlə fəalı saxlayıb və geri qaytarıb. Sumqayıtda, Ağsuda, Saatlıda, Sabirabadda və digər yerlərdə belə hallar olub, bu barədə AXCP sədr müavini Gözəl Bayramlı öz çıxışında bildirib.

O, hakimiyyətin sosial siyasətini pisləyib, 17 min tələbənin ildə 4 min manatı ödəyə bilmədiyinə görə təhsili atmaq məcburiyyətində qaldığına diqqət çəkib. Onlarla belə tələbə intihar edib.

“Niyə gənclər özlərini öldürməlidirlər, bu uşaqların günahı nədir? İntiharı neft milyardlarını talayıb xaricə aparan İlham Əliyev ailəsi etməlidir. Biz bu korrupsiyaya uğramış, avtoritar rejimə yox deyirik!

Bu rejimi və İlham Əliyevin özünü gənclərin taleyi maraqlandırmır, onu daha çox Formula-1-in taleyi maraqlandırır”, deyə o bildirib. -02В-

* * *

AXCP lideri Əli Kərimli bildirib ki, bu gün polis mitinqə gələn 51 nəfər partiya üzvünü həbs edib.

“Hakimiyyət bunu icazəli mitinq, ifadə və toplaşmaq azadlığı adlandırır”, deyə o bildirib.

Aksiya iştirakçılarının ümumi əhval-ruhiyyəsini ifadə edən Kərimli deyib ki, “xalq hakim İlham Əliyev ailəsinin xeyrinə Konstitusiyaya dəyişikliklər edilməsinin əleyhinədir”.

Kərimlinin çıxışı “İstefa!” və “Rədd ol!” çağırışları ilə bölünürdü.

Mitinq iştirakçıları həmçinin “140 milyard neft pulları hanı?”, “Biz sizi seçməmişik”, “Maaş 105 manat, təhsil haqqı 4000 manat”, “Gözünüz doymadı”, “Avropa Birliyi ilə Assosiasiya sazişi imzalansın” kimi şüarlar qaldırıblar. -02В-

2016 Sentyabr 17 (Şəmbə) 15:22:26

Milli Şuranın mitinqi keçirilən ərazidə İnternet kəsilib. Buna görə KİV hadisə yerindən birbaşa yayını dayandırıb.

İnternetin kəsilməsinin səbəbi aydın deyil, amma aksiya təşkilatçıları hakimiyyətin adətən paytaxtda, bütünlükdə ölkədə və onun hüdudlarından kənarda on minlərlə insanın müxtəlif KİV vasitəsilə izlədiyi yayımı kəsmək üçün qəsdən maneə yaratdığından əmindirlər. -0-

2016 Sentyabr 17 (Şəmbə) 15:02:56

Minlərlə insan 26 sentyabr referendumuna çıxarılmış Konstitusiyaya düzəlişlərə qarşı hakimiyyətin icazə verdiyi etiraz mitinqinə toplaşıb.

İştirakçılar “Monarxiyaya yox!”, “Talana yox!” şüarları səsləndirirlər.

Havanın yağışlı olmasına baxmayaraq, iştirakçıların sayı artmaqda davam edir. Polis stadionu güclü mühasirəyə alıb.

Xatırladaq ki, aksiyanı Demokratik Qüvvələrin Milli Şurasına daxil olan qüvvələr keçirir. -06-