Cəmil Həsənlinin ABŞ-da görüşləri

ABŞ-da səfərdə olan Milli Şuranın prezidentliyə keçmiş namizədi Cəmil Həsənli noyabrın 19-da paytaxt Vaşinqtonda görüşlərini davam etdirib. 

Cəmil Həsənli “Amerikanın səsi”nə bildirib ki, ABŞ Beynəlxalq İnkişaf Agentliyinin (USAID) Avropa və Asiya Bürosunun rəhbərinin müavini Peyc Aleksanderin rəhbərlik etdiyi nümayəndə heyəti ilə görüşüb. Qurumun Demokratiya və İdarəçilik üzrə rəhbəri Aleksander Sokolovskinin də iştirak etdiyi görüşdə Azərbaycanda demokratiyanın vəziyyəti və perspektivləri, siyasi məhbuslar, seçkilərdən sonra yaranmış vəziyyət və Milli Şura müzakirə mövzusu olub. Görüşdə habelə USAID-in Azərbaycanda fəaliyyəti və ölkədə mətbuatın durumu kimi məsələlər geniş müzakirə edilib.

Daha sonra prezidentliyə keçmiş namizəd Boston, Nyu-York və başqa şəhərlərindən gələn tələbələr və icma nümayəndələri ilə görüş keçirib. Görüşdə Azərbaycandakı vəziyyət, icmanın fəaliyyət istiqamətləri kimi məsələlər müzakirə edilib.

C.Həsənlinin noyabrın 19-da həmçinin ABŞ-ın Azərbaycandakı keçmiş səfiri Riçard Kazlariçlə görüşüb. Görüş zamanı ABŞ-Azərbaycan münasibətləri, iki ölkə arasında son zamanlar yaşanan olaylarla bağlı məsələlərə toxunulub Həsənli Riçard Kozlariçə Azərbaycandakı vəziyyəti obyektiv qiymətləndirdiyinə görə təşəkkür edib.

Noyabrın 23-dək ABŞ-da olacaq Milli Şuranın prezidentliyə keçmiş namizədi noyabrın 20-də görüşlərini davam etdirəcək. -03D-