Cenifer Morqan: Almaniya COP29 çərçivəsində Azərbaycanla birgə işləməyə hazırdır

Almaniya COP29 çərçivəsində öz təcrübəsini Azərbaycan kimi ölkələrlə bölüşmək və suyun idarə olunması ilə bağlı ümumi həllər tapmağa çalışmaq istəyir.

Bu barədə yanvarın 29-da jurnalistlərə Almaniya Federal Xarici İşlər Nazirliyinin beynəlxalq iqlim siyasəti üzrə xüsusi nümayəndəsi Cenifer Morqan  (Jeniffer Morgan) bildirib.

Morqanın fikrincə, Azərbaycan gələcək onilliklər üçün su ehtiyatlarının mövcudluğunu təmin etmək üçün Xəzər dənizi ətrafında, eləcə də bütövlükdə ölkədə və ya regionda daha dayanıqlı ekosistem qurmaq yollarını nəzərdən keçirməlidir.

“Düşünürəm ki, bununla bağlı çoxlu qlobal təcrübə var. Almaniyanın özündə adaptasiya haqqında qanunun qəbulu prosesi gedir. Biz hər bir sektora baxırıq. Son COP-un nəticələrindən biri su, ərzaq və enerji məsələlərinin daha dərindən nəzərdən keçirilməsi idi. Hesab edirəm ki, bu məsələnin öyrənilməsi Azərbaycanın da maraqlarına uyğun olardı”, deyə o qeyd edib.

O bildirir ki, Almaniya COP29 çərçivəsində Azərbaycanla birgə işləməyə hazırdır.

“Biz birbaşa COP29 prezidenti ilə işləməyə sadiqik. Biz Almaniyada 15-ci Petersberq İqlim Dialoquna ev sahibliyi edəcəyik və bu görüşdə Azərbaycanla işləməyi səbirsizliklə gözləyirik. Bu görüşün uğurlu olması üçün əlimizdən gələni edəcəyik”, deyə o bildirib.

Almaniya Federal Xarici İşlər Nazirliyinin beynəlxalq iqlim siyasəti üzrə xüsusi nümayəndəsi qeyd edib ki, İinkişaf etmiş ölkələr bu iqlim sahəsində maliyyələşdirmədə fəal rol oynamağın tərəfdarıdır.

Morqan hesab edir ki, indi Paris razılaşmasında razılaşdırıldığı kimi, bunu etmək iqtidarında olan digər ölkələrin dünya səhnəsinə çıxması və bu məsuliyyəti öz üzərinə götürməsi vaxtıdır.

Qeyd edək ki, COP29-un Azərbaycanda keçirilməsi ilə bağlı qərar rəsmi olaraq 2023-cü il dekabrın 11-də Dubayda elan edilib. Azərbaycan bu ilin noyabrında tədbirə ev sahibliyi edəcək.