Çexiya iranlı müxalifətçinin qətlinə hazırlıqda şübhəli bilinən azərbaycanlını ekstradisiya edib

Çərşənbə günü Çexiya ABŞ-da İran hakimiyyətinin məşhur tənqidçisinin qətlinə hazırlıq ittihamı irəli sürülən Gürcüstan azərbaycanlısı Polad Ömərovu ekstradisiya edib, xəbəri Turan-ın Vaşinqtondakı müxbiri verib.

39 yaşlı Ömərov, həmçinin Rüfət Əmirov və Xalid Mehdiyev ABŞ-da İranda qadınlara qarşı repressiyanı kəskin şəkildə tənqid edən məşhur hüquq müdafiəçisi Məsihə Əlinejadın öldürülməsinə cəhddə ittiham olunublar. Nyu-York prokurorluğu Ömərovun Şərqi Avropada fəaliyyət göstərən cinayətkar qrupun rəhbəri olduğunu bildirdikdən sonra o, ötən ilin yanvarında Çexiyada həbs olunub.

FKB-nin direktoru Kristofer Rey çərşənbə günü Praqada belə deyib: "Bu gün Ömərovun ekstradisiyası ilə Amerika ərazisində ABŞ vətəndaşını öldürmək məqsədilə həyasız qətl planına görə iranlıların məsuliyyətə cəlb edilməsində irəliyə doğru əhəmiyyətli addım atdıq".

ABŞ-ın Nyu York üzrə prokuroru Demian Uilyams, öz növbəsində, bu əlbirliyin "İran hakimiyyətinin ona qarşı çıxan hamını repressiyaya məruz qoymaq siyasətinə dəlalət etdiyini" bildirib.

2022-ci ilin avqustunda Amerika polisi Məsihə Əlinejadı öz evində öldürməyə cəhd edən Azərbaycan vətəndaşı Xalid Mehdiyevi həbs edib. Onun maşınında Kalaşnikov avtomatı tapılıb.

Eyni zamanda ABŞ hakimiyyəti Rüfət Əmirova və Polad Ömərova qarşı Məsihə Əlinejadın qətli məqsədilə sui-qəsd hazırlamaq ittihamı irəli sürüb. Onlar İranla bağlı olan, qətllər, adam oğurluğu və pul tələb etməklə məşğul olan cinayətkar qrupun üzvləridir.