Ermənistan öz ərazisindən axıtdığı təhlükəli sularla Araz çayını çirkləndirməyə davam edir

Qarabağ İqtisadi Rayonunda (QİR) 2 mlrd. kub metr təmiz içməli su var və bu, Azərbaycanın ən böyük su resursudur. Bu sərvətləri idarə etmək üçün "ağıllı" infrastruktura ehtiyac var, belə ki, mövcud kanallar və su boru sistemləri tamamilə dağılıb. Bu barədə Azərbaycan Ekologiya Nazirliyinin Milli Hidrometeorologiya Xidmətinin rəis müavini Əkbər Əsgərov Almaniyanın tikinti şirkətlərinin nümayəndələri ilə görüşündə bildirib. Almaniyanın Lutz-Jesco GmbH, Megger Germany GmbH, Herrenknect, Siemens AG Osterreich, Bioworks Verfahrenstechnik GmbH, GuPont Water Solutions şirkətlərinin nümayəndələrinin iştirakı ilə Almaniya-Azərbaycan Xarici Ticarət Palatasının təşkilatçılığı ilə keçirilən "Qarabağ regionunda su təchizatı və irriqasiya infrastrukturunun yenidən qurulması" mövzusunda konfransında çıxış edən Əsgərov belə deyib: "İçməli suyun saxlanılması və kənd təsərrüfatı sahələrinin suvarılması üçün su anbarları tikilməlidir. Transsərhəd suların keyfiyyətinə ciddi nəzarət olunmalıdır. Xidmət Ermənistan ərazisindən Araza axan Oxçuçay və Bazarçay çaylarında suyun tərkibini ildə dörd dəfə yoxlayır. Bu iki çayda Ermənistanın dağ-mədən sənayesinin ağır metal və digər tullantılarının tərkibi normadan dəfələrlə çoxdur".

Eyni zamanda, Kəlbəcər rayonunda termal və mədən sularının təhlili  işğal dövründə suyun təmizliyinin dəyişmədiyini göstərib. Lakin ermənilər bu suyun yaşayış məntəqələrinə və işğaldan əvvəl insanların yaşadığı və sanatoriya-kurort obyektlərinin yerləşdiyi yerlərə çatdırılması infrastrukturunu dağıdıblar, deyə Əsgərov sözünə davam edib.

Milli Hidrometeorologiya Xidməti Ağdam rayonunda 580 artezian quyusunu, Füzuli rayonunda yeni hava limanının su təchizatı infrastrukturunu, Şuşa rayonunda mədənləri və quyuları tədqiq edib. Ermənilərin bu ərazilərdə bütün sutəmizləmə və ölçmə qurğularını məhv etdiyi müəyyən edilib.

2020-ci ildən etibarən Xidmət QİR-də yağış sularının, çirkab suların və digər suların təhlili üçün 11 yeni hidroloji stansiya quraşdırıb. İşlər davam etdirilir, yeni avtomatik stansiyalar 2025-ci (5 stansiya) və 2026-cı (5 stansiya) ildə quraşdırılacaq.

Bu il Füzulidə beynəlxalq hava limanı ərazisində hava axınlarının təhlili üçün zond-aerostat buraxmaq imkanına malik aerostansiya tikiləcək, deyə Əsgərov bildirib.