“Amerikanın qızıl dövrü indi başlanır” - Donald Trump

ABŞ-ın 47-ci prezidenti olaraq and içdikdən sonra söylədiyi nitqdə Prezident Donald Tramp “Amerikanı birinci yerdə” qoyacağını vəd etdi.

Nitqinin ilkin hissəsində Tramp mərasimə qatılan sabiq prezidentlərə, o cümlədən Prezident Co Baydenə minnətdarlığını ifadə etdi.

“Bu gündən etibarən bizim ölkə çiçəklənəcək və dünya boyu yenidən hörmət olunacaq”, Tramp deyib. “Biz hər bir millətin həsəd obyekti olacağıq və başqalarına bizdən sui-istifadə etməyə imkan verməyəcəyik”.

İlkin ifadələrdən sonra Tramp keçmiş siyasi rəqiblərinin ünvanına tənqidlər səsləndirdi və siyasətdə baş verəcək əsaslı dəyişikliklərin anonsunu verdi.

Cəmi bir qədər aralıqda Bayden əyləşmişkən, Tramp sələfinin administrasiyasının “ daxildə adi böhranla ayaqlaşa bilmədiyini” və “xaricdəki fəlaklətli” olayların öhdəsindən gələ bilmədiyini vurğuladı.

Tramp Ədliyyə Nazirliyindən silah kimi istifadə edilməsinə son qoyacağını bəyan etdi.

“Ədalətin tərəzisi balanslaşdırılacaq. Ədliyyə Nazirliyindən və hökumətdən yırtıcı, zorakı və ədalətsiz qaydada slah kimi istifadə edilməsinə son qoyulacaq”, o bildirdi.

Donald Tramp 47-ci prezident olaraq milli uğur erasının başlanğıcında “arxayın və nikbin” olduğunu bəyan etdi.

O, ölkənin böyük dəyişikliklər astanasında olduğunu bildirərək Amerikanın fürsəti qaçırmayacağına diqqət çəkdi.

Prezident Tramp hakimiyyətinin ilk günündə bir neçə fərmanlar verəcəyini elan etdi.

“Bu gün mən tarixi fərmanlar imzalayacağam. Bu addımlarlara biz Amerikanın tam bərpasına və sağlam zəkanın inqilabına başlayacağıq”, o bildirdi.

47-ci prezident bu fərmanlar arasında cənub sərhədləri ilə bağlı ölçülərin prioritet olacağını söylədi.