Qubad İbadoğlu Bakıda yaşasa da, ona Sumqayıt polisi nəzarət edir

Qış mövsümü ilə əlaqədar olaraq kommunikasiya və kommunal xidmətlərin təminatında qarşılaşdığı çətinliklərə görə Sumqayıtdan yaşayış yerini dəyişərək Bakıya köçən Qubad İbadoğlu iki həftədir ki, qeydiyyata düşmək üçün həftənin 2-ci və 4-cü günləri yenə də Sumqayıt şəhər 1 saylı polis bölməsinə gedir.

Halbuki, Polisin nəzarəti altına vermə və ev dustaqlığı qətimkan tədbirlərinin tətbiq edilməsi qaydaları haqqında Təlimatın 3.18-ci maddəsinə görə, polisin nəzarəti altına vermə qətimkan tədbiri seçilmiş şəxs daimi yaşadığı və ya müvəqqəti olduğu yeri başqa yaşayış məntəqəsinə dəyişdikdə nəzarət işi 24 saat ərzində həmin polis orqanına göndərilir.

Yaşayış yerini dəyişməzdən öncə Qubad İbadoğlunun vəkili Zibeydə Sadıqovanın Baş Mütəşəkkil Cinayətkarlıqla Mübarizə İdarəsinin İstintaq şöbəsinə şifahi və yazılı şəkildə müraciətləri indiyədək cavabsız qalıb.

Qubad İbadoğlunun işi üzrə ibtidai istintaq 29 iyul 2024-cü ildən qeyri-müəyyən müddətə dayandırılıb. Qərarın verilməsindən 6 ayadək müddət ötməsinə baxmayaraq, bu qərarla nə onun özü, nə də vəkilləri tanış olmayıb. Bununla bağlı Apelyasiya Məhkəməsinin 08.01.2025-ci il tarixli qərarı da icra olunmur.

Mövcud qanunvericilikdə istintaqın dayandırılması zamanı polis nəzarətinə verilmə qətimkan tədbirinin saxlanılmasına dair hüquqi norma yoxdur. Lakin, buna baxmayaraq, Qubad İbadoğlu ev dustaqlığına buraxılandan sonra tətbiq edilən polis nəzarəti və onun həftədə 2 dəfə polisdə məcburi qeydiyyatı ibtidai istintaq qeyri-müəyyən müddətə dayandırılandan sonra da davam etdirilir. Odur ki, Qubad İbadoğlu 9 aydır ki, müntəzəm olaraq həftədə 2 dəfə qeydiyyata düşmək üçün Sumqayıt şəhər 1 saylı polis bölməsinə gedir.

Yeri gəlmişkən, Qubad İbadoğlunun şəxsiyyət vəsiqəsi yenə də etibarsızdır. Hüquqşünaslar Azərbaycanda heç vaxt müşahidə olunmayan bu halı şəxsi həyata müdaxilə kimi qiymətləndirirlər.