Çexiya parlamentinin spikeri: Qarabağ Azərbaycanın ayrılmaz tərkib hissəsidir

Fevralın 1-də Milli Məclisdə spiker Sahibə Qafarovanın Azərbaycanda rəsmi səfərdə olan çexiyalı həmkarı Marketa Pekarova Adamova ilə görüşü keçirilib.

Söhbət zamanı Sahibə Qafarova Avropa Şurası Parlament Assambleyasının Azərbaycana qarşı addımlarını pisləyib, Strasburqu "ikili standartlarda" ittiham edib. 

Buna cavab olaraq Marketa Pekarova Adamova qeyd edib ki, Çexiya parlamentariləri Azərbaycanla bağlı məsələnin müzakirəsində iştirak etməyiblər və onun lehinə səs verməyiblər.

O, həmçinin bildirib ki, "Qarabağ Azərbaycanın ayrılmaz hissəsidir, Çexiya həmişə Azərbaycanın ərazi bütövlüyünü dəstəkləyib. Çexiya Cənubi Qafqazda möhkəm sülhün və sakitliyin bərqərar olması üçün Azərbaycan və Ermənistan arasında dialoqun davam etdirilməsinin tərəfdarıdır".

Qonaq həmçinin qeyd edib ki, Çexiya bütün sahələrdə Azərbaycanla münasibətlərin daha da inkişaf etdirilməsində maraqlıdır. O qeyd edib ki, onun rəhbərlik etdiyi nümayəndə heyətinə işgüzar dairələrin və ali təhsil müəssisələrinin nümayəndələri daxildir, bu da Çexiyanın Azərbaycanla müxtəlif sahələrdə dialoqu davam etdirmək niyyətini göstərir.

Görüşdə dövlətlərarası və hökumətlərarası əməkdaşlığın inkişaf perspektivləri və qarşılıqlı maraq doğuran digər məsələlər haqqında fikir mübadiləsi aparılıb. Bu barədə Azərbaycan Milli Məclisinin mətbuat xidməti məlumat yayıb.