Ceyhun Bayramov: Bir tərəfdaşı digərinə qarşı silahlandırmaq Şərq Tərəfdaşlığının məqsədləri ilə uzlaşmır

Bakı/12.12.23/Turan: Azərbaycan xarici işlər naziri Ceyhun Bayramov dekabrın 11-də Brüsselə işgüzar səfəri çərçivəsində Şərq Tərəfdaşlığı (ŞT) ölkələrinin xarici işlər nazirlərinin görüşündə çıxış edib.

Görüşdə Şərq Tətəfdaşlığı çərçivəsində əməkdaşlığın hazırkı vəziyyəti, Avropa İttifaqı (Aİ) ilə tərəfdaş ölkələr arasında münasibətlərin gələcək perspektivləri və regional təhlükəsizlik məsələləri ətrafında müzakirə aparılıb.

Xarici işlər naziri Ceyhun Bayramov çıxışında Azərbaycanın Aİ-Mərkəzi Asiya Strategiyasına uyğun olaraq regional nəqliyyat, enerji və rəqəmsal əlaqəni artırmaq məqsədlərinə, Cənub Qaz Dəhlizinin genişlənən potensialına toxunub, habelə Orta Dəhlizin əhəmiyyətindən danışıb.

Nazir Bayramov Ermənistan ilə Azərbaycan arasında münasibətlərin normallaşdırılması prosesi barədə danışarkən deyib ki, bir-birinin suverenliyi və ərazi bütövlüyünün qarşılıqlı tanınması və hörmət edilməsi Cənubi Qafqazda davamlı sülh, sabitlik və firavanlığa aparan yeganə yoldur.

“Azərbaycanın öz haqlı narahatlığını hərtərəfli və açıq şəkildə ifadə etməsinə baxmayaq, bəzi Aİ üzv dövlətləri tərəfindən qızışdırıcı ritorikanın və birtərəfli addımların davam etdirilməsi narahatlıq yaradır. Aİ-nin Ermənistandakı Monitorinq Missiyasının Ermənistanla Azərbaycan arasında etimada töhfə vermək kimi bəyan etdiyi məqsədlərə nail olmayıb, əksinə Azərbaycan əleyhinə təbliğat vasitəsi kimi geniş şəkildə istifadə olunur, Ermənistanı, o cümlədən Aİ vasitəsilə silahlandırmaq kimi sabitliyi daha da pozan təşəbbüslərinin Aİ-nin “tərəfsiz vasitəçi” kimi etibarına və ümumiyyətlə, Ermənistan və Azərbaycan arasında normallaşma səylərinə xələl gətirir. Bir tərəfdaşı digərinə qarşı silahlandırmaq və ya başqa şəkildə istismar etmək heç bir halda Şərq Tərəfdaşlığının elan edilmiş məqsədləri ilə uzlaşmır”, deyə nazir Bayramov qeyd edib.

Ceyhun Bayramov bütün aidiyyəti tərəfləri Ermənistan və Azərbaycan arasında normallaşmaya zərər verməməyə çağırıb.

Bu arada Avropa İttifaqının Xarici İşlər və Təhlükəsizlik Siyasəti üzrə Ali Nümayəndəsi Cozep Borrell Aİ Xarici İşlər Nazirləri Şurasının iclasından əvvəl keçirilən mətbuat konfransında deyib ki, Ermənistandakı vəziyyət Avropa İttifaqının qəti dəstəyini tələb edir.

“Şərq Tərəfdaşlığı ölkələrindəki vəziyyətə diqqəti davam etdirmək vacibdir. Xüsusilə də çox çətin vəziyyətdə olan Ermənistan... Ermənistandakı vəziyyət bizim güclü dəstəyimizi tələb edir”, deyə Borrell bildirib.

Jozep Borrel deyib ki, dekabrın 11-də Aİ ölkələrinin xarici işlər nazirləri Aİ-nin Ermənistandakı mülki missiyasının sayını 50 faiz - 138 nəfərdən 209 nəfərə qədər artırmaq qərarına gəlib.

 “Bu gün Aİ Şurası yerdəki mövcudluğumuzu 138-dən 209-a çatdırmaqla Ermənistandakı mülki missiyamızı gücləndirmək qərarına gəlib, bu, missiyanın sayının mühüm artımıdır və Ermənistanın Azərbaycanla beynəlxalq sərhədinin sabitliyini artırmaq üçün bir yoldur", deyə Borrel qeyd edib. 03