C.Həsənli: Hakimiyyət Avropalı deputatları Hilton otelində ələ alıb

Azərbaycanda 9 oktyabr prezident seçkilərində hakimiyyətin qəsbi baş verib və Konstitusiya Məhkəməsi saxtalaşdırılmış səsvermə yekunlarını təsdiq edib. Bu barədə bugünki mətbuat konfransında Demokratik Qüvvələrin Milli Şurasından (DQMŞ) prezidentliyə keçmiş namizəd Cəmil Həsənli bildirib.

Onun sözlərinə görə, Əliyevin inauqurasiyasının tələsik keçirilməsi dünya ictimaiyyətinin seçkilərin nəticələrini qəbul etmədiyini göstərir.

Oktyabrın 17-də MSK seçkilərin yekun protokolunu təsdiq edib, oktyabrın 18-də Həsənli apellyasiya şikayəti verib və elə həmin gün iş günü başa çatdıqdan sonra Bakı Apellyasiya Məhkəməsi şikayəti təmin etməyib.

Konstitusiya Məhkəməsinin iclası oktyabrın 19-na təyin edilib.

“Konstitusiya Məhkəməsi bizim şikayətimizə Ali Məhkəmədə baxılmasının başa çatmasını gözləməli idi”, deyə Həsənli bildirib.

İnauqurasiya ictimaiyyət məlumatlandırılmadan, tələsik keçirilib.

Həsənlinin fikrincə, hakimiyyət başa düşüb ki, dünyanın aparıcı dövlətlərinin nümayəndələrindən heç kim belə bir mərasimə gəlməyəcək.

Onun sözlərinə görə, hakimiyyət təmtəraqlı inauqurasiyaya hazırlaşırdı və hətta gül mağazalarında böyük partiyada gül sifariş vermişdi.

Həsənli hesab edir ki, səsvermədə seçicilərin 20%-i iştirak edib və əksəriyyət Həsənliyə səs verib. 50 seçki dairəsi ərazisində səsvermənin nəticələri tamamilə, qalan 75 dairədə isə qismən saxtalaşdırılıb. Həsənli kobud saxtalaşdırmalara nümunə kimi Beyləqan rayonunun seçki məntəqələrini göstərib.

Seçki qərargahının əlində 2500 məntəqədən pozuntular haqqında aktlar və videosübutlar var və dünya ictimaiyyəti bu haqda məlumatlandırılacaq.

Brüsseldə, Parisdə və Strasburqda keçirdiyi görüşlər haqqında danışan Həsənli deyib ki, Avropa qurumları AŞPA və Avropa Parlamenti missiyalarının seçkilərlə bağlı qalmaqallı qiymətləndirmələrini araşdırır.

Həsənli bildirib ki, AŞPA nümayəndə heyəti üzvləri ilə Strasburqda Hilton otelində onlara qonorarlar ödənilməsi haqqında danışıqlar haqqında səhih dəlillər var.

“Biz bu danışıqları Azərbaycan rəsmilərindən kimin apardığını, kimin tərcüməçi olduğunu bilirik. Fransanın hüquq mühafizə orqanları da bunu bilir. Zamanla bu məlumatlar açıqlanacaq”, deyə Həsənli bildirib.

Avropa deputatlarının bir hissəsinin korrupsiyaya uğramış Azərbaycan nazirlərinin övladları ilə əlaqəsi var, deyə Həsənli qeyd edib.

O bildirib ki, oktyabrın 27-də DQMŞ seçkilərin saxtalaşdırılmasına qarşı etiraz aksiyası keçirəcək.

Ayın 24-də DQMŞ-nin sessiyasında təşkilatın gələcək prioritetləri müəyyən olunacaq. “Fırıldaqçı bəyanatlarla çıxış edənlərin və hakimiyyətə işləyənlərin DQMŞ-da yeri yoxdur”, deyə o bildirib.

14-24 noyabr tarixlərində Həsənli ABŞ-a səfər edəcək, Dövlət Departamenti, Senat, Nümayəndələr Palatası və s. nümayəndələri ilə görüşlər keçirəcək.

Biryulevoda baş verən hadisələrə toxunan Həsənli hakimiyyətin 1,2 mln. iş yeri açdığı haqqında bəyanatlarının yalan olduğunu bildirib. Belə olan halda ölkə vətəndaşları ölkəni tərk etməzdilər və Biryulevo və başqa yerlərdə belə məhrumiyyətlərə və alçaldılmalara məruz qalmazdılar, deyə o bildirib. -03C06-