Daha iki N!DA-çı həbs edilib

Bakı/30.03ş13/N!DA Vətəndaş Hərəkatının İdarə Heyətinin üzvü Rəşadət Axundov saxlanaraq Baş Prokurorluğun Ağır Cinayətlərə Dair İstintaq İdarəsinə aparılıb. Bu barədə Turana N!DA Vətəndaş Hərəkatının İdarə Heyətinin üzvü Turqut Qəmbər bildirib. 

Turqut Qəmbər bildirib ki, Rəşadət Axundov bu gün günorta saatlarında saxlanıb. Rəşadət Axundovun vəkili  Namiq bəy zəng eləyib bildirib ki, Rəşadəti Ağır Cinayətlərə Dair İstintaq İdarəsinə aparıblar.

“Rəşadət Axundovu heç kimin xəbəri olmadan, əvvəlcədən xəbər etmədən aparıblar. Biz bunu N!DAya qarşı basqıların davamı kimi qiymətləndiririk," Turqut Qəmbər bildirib.

Son məlumatlara görə, N!Da-nın İdarə Heyətinin üzvü Uzeyir Məmmədlidə həbs edilib. Onun barəsində 3 ay həbs qəti imkan tədbiri seçilib.   

Bununla yanaşı, N!DA-çı jurnalist Elmin Bədəlovun da telefonuna zəng çatmır. N!DA-çılar onun da saxlandığını ehtimal edir. 

Xatırladaq ki, martın 14-də N!DA İdarə Heyətinin digər üzvü Rəşad Həsənov, martın 9-da N!DA-nın üç fəalı - Şahin Novruzlu, Bəxtiyar Quliyev və Məmməd Əzizov saxlanılıb. Məhkəmə onların narkotik və partlayıcı maddələr saxlamaq ittihamı ilə 3 ay müddətinə həbsinə qərar verib.-03B-