Hakimiyyət NİDA hərəkatına qarşı repressiyaları gücləndirir

Şənbə günü NİDA vətəndaş hərəkatının İdarə Heyətinin iki üzvü Üzeyir Məmmədli və Rəşadət Axundov saxlanılıb. Onlar Baş Prokurorluğun Ağır Cinayətlər üzrə İstintaq İdarəsinə aparılıb. Onlar CM-in 228.3-cü maddəsi (mütəşəkkil cinayətkar qrupun tərkibində qanunsuz silah, partlayıcı maddə və qurğunun saxlanması) ilə ittiham olunurlar. Bundan sonra gənclər Nəsimi Rayon Məhkəməsinə aparılıb və onların barəsində 3 aylıq həbs qətimkan tədbiri seçilib. 

Gənclərin vəkilləri bildiriblər ki, müdafiə etdikləri şəxslər özlərini təqsirkar saymırlar.

Vəkil Fəxrəddin Mehdiyev Turan bildirib ki, istintaq müttəhimin günahını sübut etmək üçün inandırıcı dəlil göstərməyib və həbsi bundan əvvəl 4 fəalın həbs olunduğu cinayət işi ilə əlaqələndirib.

Ü.Məmmədli və R.Axundovun vəkilləri həbslə əlaqədar apellyasiya şikayəti vermək niyyətindədir.

Xatırladaq ki, martın 7-də NİDA fəalları Şahin Novruzlu və Məmməd Əzizov həbs olunublar. Onlar əsgər ölümlərinə etiraz olaraq qarşıdakı 10 mart aksiyasında zorakı hərəkətlərin hazırlanmasında ittiham olunublar. 

İstintaqın məlumatına görə, fəalların mənzillərində partlayıcı maddələr və narkotik vasitələr aşkarlanıb. Lakin onların qohumları bildiriblər ki, partlayıcı maddəni hüquq-mühafizə orqanları əməkdaşlarının özləri gətiriblər. Martın 14-də NİDA-nın daha bir fəalı Rəşad Həsənov həbs olunub. 

Amnesty International beynəlxalq hüquq-müdafiə təşkilatı onları “vicdan məhbusu” sayıb.

NİDA İdarə Heyətinin üzvü Turqut Qəmbər fəalların siyasi motivlərlə təqib olunduqlarını bildirib. Onun fikrincə, hakimiyyət NİDA-nı sarsıtmağa çalışır. Lakin bu həbslər hərəkat üzvlərinin demokratiya uğrunda əzmini daha da möhkəmləndirir. 16B06—