DAK məsulu: İranın notası gülüncdür

İranın Azərbaycan tərəfə nota verməsi Azərbaycan XİN-in açıqlamasından bizə məlum olub. Bu haqda Turan-a Dünya Azərbaycanlıları Konqresinin (DAK) məsullarından Samir Əsədli bildirib.

Onun sözlərinə görə, İran tərəf notanı DAK-ın dekabrın 5-də Bakıda Güney Azərabycanda insan haqlarının durumu ilə bağlı keçirilən toplantı ilə bağlı verib.

Notada DAK-ın İranda Cənubi Azərbaycan dövləti yaratmaq təşəbbüsü ilə çıxış etdiyi bildirilir və bu, sənəddə separatizm kimi dəyərləndirilir. Rəsmi Bakıya belə addımların qaşrısını almaq tövsiyyəsi verilir. 

Bu faktı Turan-a şərh edən S.Əsədli İran tərəfin verdiyi notanı gülünc adlandırıb. DAK-ın Cənubi Azərbaycan dövləti yaratmaq təşəbbüsü etmədiyini deyib. İran tərəfə Azərbaycan Xalq dövlətinin 1945-1946-cı illərdə mövcud olduğunu xatırladıb. Bakıda keçirilən adı çəkilən toplantıda isə dövlət yaratmaq yox, Güney Azərbaycan türklərinin milli, mədəni, insani haqları barədə danışılıb. İnsan haqlarının bir dövlətin daxili işi olmadığını deyən S.Əsədli Güney Azərbaycan türklərinin məsələsinini də İranın daxili işi olmadığını söyləyib. “DAK yarandığı 1996-cı ildən bu yana Güney Azərbaycan türklərinin haqları uğrunda mübarizə aparır, amma İran tərəf bundan niyə belə “tez” xəbər tutub, buna təəccüb edirəm”, - deyə S.Əsədli ironik cavab verib.

S.Əsədli İranın bu hədələrinə baxmayaraq, DAK-ın və DAK rəhbərliyinin Güney Azərbaycan türklərinin haqları uğrunda mübarizəni bundan sonra daha əzmlə aparacağını nəzərə çatdırıb. -05B-