Azərbaycan hüquq müdafiəçiləri AŞPA məruzəçilərinin hesabatına təəccübləniblər

AŞPA Monitorinq Komitəsinin məruzəçiləri Pedro Aqramunt (İspaniya) və Cozef Qreşin (Malta) ölkənin Avropa Şurası qarşısında öhdəliklərini yerinə yetirməsi haqqında hesabatının məzmunu Azərbaycan hüquq müdafiəçilərini sözün yaxşı mənasında təəccübləndirib.

Onların fikrincə, məruzə Azərbaycanda insan hüquqları və demokratiya sahəsindəki problemləri kifayət qədər obyektiv əks etdirir.

Məruzə və müvafiq qətnamə layihəsi dekabrın 12-də Monitorinq Komitəsi tərəfindən təqdir edilib və AŞPA-nın qış sessiyasına çıxarılması tövsiyə olunub.

“Məruzənin məzmunu mənim üçün tamamilə gözlənilməz oldu. Bundan əvvəl həmməruzəçilər insan hüquqları sahəsində problemlərə açıq-aşkar qiymət vermirdilər. Bundan başqa, hüquq müdafiəçiləri ilə qapalı görüşlərdə onlar açıq-aşkar hökumətin mövqeyini müdafiə edirdilər. Lakin hesabatda siyasi məhbuslar, toplaşmaq, ifadə azadlıqlarının məhdudlaşdırılması problemləri əksini tapıb”, deyə İnsan Hüquqları Klubunun rəhbəri Rəsul Cəfərov Turan-a bildirib.

Sülh və Demokratiya İnstitutunun (SDİ) direktoru Leyla Yunus məmnuniyyətlə qeyd edib ki, məruzənin yekun variantı apreldə yayılmış və Azərbaycan Prezident Administrasiyasi tərəfindən müsbət qiymətləndirilmiş informasiya xarakterli aralıq sənəddən xeyli fərqlənir. 

Yunus məhkəmə hakimiyyətinin müstəqilliyinin təmin edilməsində proqress olmadığının və vətəndaş cəmiyyətinin korrupsiyaya qarşı mübarizəyə cəlb edilməsi zərurətinin qeyd edilməsini müsbət hal adlandırıb. 

Yunus həmçinin siyasi məhbuslar haqqında xüsusi paraqrafın mövcudluğundan məmnunluğunu bildirib. Hüquq müdafiəçisi məruzədə mətbuat azadlığı sahəsində problemlərin və diffamasiya haqqında qanunun qəbulu haqqında tələblərə dəstəyin əksini tapmasını, habelə işgəncə probleminin yer almasını müsbət qiymətləndirir. 

Bununla belə, Yunus qeyd edib ki, Aqramunt və Qreşin məruzəsində demək olar ki, müxtəlif sahələrdə insan hüquqlarının pozulmasının nümunəsi yoxdur. Eyni zamanda, o hesab edir ki, məruzəçilərin mövqeyinin sərtləşməsi Azərbaycan vətəndaş cəmiyyətinin fəal müqavimətinin, beynəlxalq hüquq müdafiə təşkilatlarının səylərinin, Qərb KİV-lərində Azərbaycanda insan hüquqları sahəsində problemlərin işıqlandırılmasının, demokratik ictimaiyyətin dəstəyinin nəticəsi olub. Eyni zamanda, hüquq müdafiəçisinin fikrincə, qətnamə AŞPA tövsiyələrini yerinə yetirmədiyi halda Azərbaycana qarşı sanksiyalar mexanizmi də nəzərdə tutmalı olduğunu bildirib.

“Demokratiya Monitoru” QHT-nin rəhbəri Fuad Həsənov da hesab edir ki, məruzənin yekun variantına yerli və beynəlxalq hüquq müdafiə qurumlarının Aqramunt və Qreşin ünvanına tənqidləri, habelə AŞPA deputatlarının bu tənqidə reaksiyası təsir göstərib. Onun fikrincə, məruzədə Azərbaycanda insan hüquqları ilə bağlı bir çox problemlər əksini tapıb.

Eyni zamanda, Həsənov hesab edir ki, bir sıra məsələləri AŞPA-nın qış sessiyasına qədər də həll etmək və beləliklə, bəzi tənqidi məsələləri qətnamədən çıxarmaq olar. -06B-