![Deputata qarşı edilən hücumla bağlı hökm verildi](https://turan.az/resized/news/2024/0Gj54vOXAQtRyV2m8ZtynKXgnLF6qa6IgmYlWI2q-750-500-resize.webp)
Deputata qarşı edilən hücumla bağlı hökm verildi
Deputata sui-qəsd edənlərə hökm oxunub
Avqustun 13-də Bakı Ağır Cinayətlər Məhkəməsində deputat Fazil Mustafaya hücum işi üzrə prosesdə hökm oxunub.
Sui-qəsdin təşkilatçısı Azər Sarıcanov ömürlük, sui-qəsdin icraçısı Səbuhi Şirinov 20 il, daha iki müttəhim Rəşad Əhmədov və Elşad Əsgərov müvafiq olaraq 19 və 18 il, Emin Əliyev 4 il müddətinə azadlıqdan məhrum ediliblər.
Müttəhimlər dini mövzularda verdiyi açıqlamalara və Aşura mərasiminə hörmətlə yanaşmadığına görə deputatı "cəzalandırmaq" istədiklərini söyləyərək günahlarını qismən etiraf ediblər.
Xatırladaq ki, müttəhimlər Azərbaycan Cinayət Məcəlləsinin 277-ci (dövlət və ya ictimai xadimin həyatına cəhd) və 228.2.1-ci (bir qrup şəxs tərəfindən silah və sursatın qanunsuz dövriyyəsi) maddələrilə ittiham olunublar. Sarıcanov, Şirinov və Əhmədovun barəsində dövlətə xəyanət maddəsi də tətbiq edilib.
Təqsirləndirilən şəxslər deyiblər ki, Mustafanı öldürmək niyyətində olmayıblar, onu "cəzalandırmaq" istəyiblər.
Deputata atəş açan Səbuhi Şirinov bildirib ki, Mustafanı öldürmək istəsəydi, ölümcül atəş açaraq bunu edərdi.
Deputat Fazil Mustafa özü vətəndaşların dini hisslərini təhqir etməsi barədə iddiaları qətiyyətlə rədd edir.
"Məhkəmədə mənim nümayəndəm təqsirləndirilən şəxslərə və onların vəkillərinə din mövzusunda kitablarımda, mediada və sosial şəbəkələrdə çoxsaylı yazı və nəşrlərdə müsəlman dindarları təhqir etdiyimə dair ən azı bir cümlə tapmağı təklif etdi. Bəli, mən fanatizmin, xurafatın, cəhalətin əleyhinəyəm. Bəli, demişəm və yazmışam ki, bütün bunların və özünüdöymənin islama və Məhəmməd peyğəmbərlə heç bir əlaqəsi yoxdur", – Mustafa Turan agentliyinə bildirib.
Mustafa ona atəş açan Şirinov üçün cəzanı "yumşaq" hesab edib.
"Məsələ mənim şəxsi incikliyim deyil. Mənə ciddi maddi və mənəvi ziyan dəysə də, maddi təzminat iddiası qaldırmadım. Söhbət dövlətin maraqlarından getdikdə, hesab edirəm ki, qanun bütün ciddiliyilə tətbiq olunmalıdır. Bu, təkcə mənə qarşı yox, həm bizim dövlətə qarşı, onun dünyəvi quruculuğuna qarşı hücum idi”, - Mustafa deyib.
*28 mart 2023-cü ildə axşam Bakıda naməlum şəxs Fazil Mustafaya bir neçə dəfə atəş açıb. Deputat yaralanıb və xəstəxanaya aparılıb. Həkimlər onun həyatına təhlükənin olmadığını bildiriblər.
İş Azərbaycan Cinayət Məcəlləsinin 277-ci (dövlət və ya ictimai xadimin həyatına cəhd) və 228.2.1-ci (bir qrup şəxs tərəfindən silah və sursatın qanunsuz dövriyyəsi) maddələrilə araşdırılıb.
İstintaqın versiyasına görə, deputata sui-qəsd İran xüsusi xidmət orqanlarının göstərişilə təşkil edilib.
-
- Böyük Şərq
- 13 Avqust 2024 12:16
Siyasət
-
ABŞ çərşənbə günü AXCP sədri Əli Kərimlinin Azərbaycanda təqib olunması ilə bağlı xəbərlərə münasibət bildirib.
-
Müsavat Partiyasının sədri İsa Qəmbər avqustun 14-də ATƏT-in Seçki Müşahidə Missiyasının rəhbəri Ditmir Buşati ilə görüşüb. Görüş Müsavat Partiyasının qərargahında keçirilib və sentyabrın 1-nə təyin olunan növbədənkənar parlament seçkiləri ilə bağlı müzakirələr aparılıb.
-
Türkiyə hakimiyyəti ölkəyə gələn hər kəsin barmaq izini götürmək barədə qərar verib. Bu barədə "Sabah" nəşri ölkənin daxili işlər naziri Ali Yerlikayaya istinadla xəbər yayıb. Lakin bu qərarın hansı tarixdən etibarən tətbiq ediləcəyi açıqlanmayıb.
-
İnternet provayderləri arasında sui-istifadə hallarına qarşı araşdırmalara başlanılıb, bu barədə avqustun 14-də İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti məlumat yayıb.
Rəy yaz