DİN 2 gün sonra Kekalovun saxlanıldığını etiraf edib

Bakı/22.11.23/Turan: Noyabrın 22-də səhər saatlarında Daxili İşlər Nazirliyi ictimai fəal Məhəmməd Kekalovun saxlanıldığını təsdiq edib.

Gənc hələ noyabrın 20-də mülki geyimli şəxslər tərəfindən saxlanılıb və evindən aparılıb. Həmin şəxslər həmçinin onun kompüterini və mobil telefonunu götürüblər. Polislər özlərini təqdim etməyib və Kekalovun ailə üzvlərinə onun saxlanılmasının səbəbini bildirməyiblər. 

 İki gün ərzində Kekalovun yaxınları və vəkili onun harada olduğunu öyrənə bilməyib. Nəhayət, bu gün DİN-in mətbuat xidməti rəsmi olaraq onun saxlanıldığını təsdiq edib.

"Məhhəməd Kekakov müvafiq iş üzrə cinayət məsuliyyətinə cəlb olunub. Barəsində  araşdırma aparılır", deyə DİN-in mətbuat xidmətindən Turan-a bildiriblər və onun vəkillə təmin edildiyini əlavə ediblər.

Lakin Kekalovun ailəsinin müqavilə bağladığı vəkil Rövşanə Rəhimova idniyədək Kekalovun harada saxlanılması və saxlanılmasının səbəbi barədə məlumat ala bilmir.

 Kekalovun həmkarları onun Abzas Media ilə əməkdaşlığı səbəbindən bu nəşrin rəhbərlərinə qarşı işlə əlaqədar saxlanıldığını hesab edirlər. 

Xatırladaq ki, 20-21 noyabr tarixlərində Abzas Media-nın direktoru və baş redaktoru - Ülvi Həsənli və Sevinc Vaqifqızı saxlanılıb. Onlar xarici valyuta qaçaqmalçılığında ittiham olunublar.

Dünən məhkəmə onları 4 ay müddətinə həbs edib. 

Abzas Media hakimiyyətin yüksək eşelonlarında korrupsiya faktlarının araşdırılması ilə məşhurdur. 03В06