DİN və prokurorluq Tərtərdəki iğtişaşlar barədə (YENİLƏNİB)

DİN və Baş Prokurorluq Tərtər müvəqqəti saxlama təcridxanasında məhbus Səbuhi Dünyamalıyevin zorakılıqla ölümü barədə məlumatı təkzib edib.

Bəyanatda deyilir ki, CM-in 234.2-ci maddəsi (narkotik maddənin qanunsuz əldə edilməsi və ya saxlanması) ilə ittiham olunan Ağdam rayon sakini Səbuhi Dunyamalıyev fevralın 4-də mələfə ilə özünü asıb.

Bununla əlaqədar 100-ə yaxın adam (Ağdam rayon qaçqınları) polis bölməsinə hücum edərək qanunazidd hərkətlər törədib, ictimai asayişi kobud şəkildə pozub, inzibati binaya maddi ziyan vurub.

Görülən tədbirlər nəticəsində qanunazidd hərəkətlərin qarşısı alınıb. 8 nəfər polis işçisi müxtəlif dərəcəli xəsarət alıb.

Fakt üzrə rayon prokurorluğunda CM-in 125-ci maddəsi (özünü öldürmə həddinə çatdırma) və  315.1 (hakimiyyət nümayəndəsinə qarşı müqavimət və zor tətbiq etmə) maddələri ilə cinayət işi qaldırılıb.

Polis bölməsinə hücum edən 6 nəfərin şəxsiyyəti müəyyənləşdirilib və saxlanılıb.

Mərhumun yaxın qohumlarının xahişi və iştirakı ilə məhkəmə-tibbi ekspertiza keçirilib və cəsəddə zorakılıq əlamətləri aşkar edilməyib.

DİN-in apardığı təhqiqat zamanı həmin gün xidmətdə olan polis əməkldaşının öz işinə səhlənkarlıqla yanaşdığı müəyyən, o, polis sıralarından xaric edilib.

Rayon prokurorluğu onun hərəkətlərinə hüquqi qiymət verəcək.

Hazırda Tərtər rayonunda vəziyyət stabildir, kriminogen durum nəzarət altındadır.-16D04-

2015 Fevral 06 (Cümə axşamı) 00:25:12

Fevralın 4-də axşamdan keçmiş Tərtərdə etiraz aksiyası keçirilib. Narazılığa polisin hərəkətləri, əsasən Ağdam sakini Dünyamalıyevin rayon polis bölməsində ölümü səbəb olub. Qohumları bildiriblər ki, mərhumun cəsədində işğəncə uzləri olub, lakin polis   mərhumun özünü asdığını bildirib.

Dünyamalıyev yanvarda narkotik maddə alverində ittiham olunaraq həbs edilib. Lakin onun günahını sübut edə bilməyiblər.

Onun ölüm xəbəri rayon mərkəzində narazılıqla qarşılanıb  və yüzlərlə adam mərkəzə toplaşıb.  Mərhumun qohumları və yaxınları rayon polis şöbəsinin pəncərələrini sındırıblar.

Etirazçıları saxlamaq üçün rayona daxili qoşunlar gətirilib.

Hüquq-mühafizə qüvvələri və etirazçılar arasında toqquşma baş verib, xəsarət alanlar var. Yerli sakinlər bildiriblər.

Lakin Tərtər polis rəhbərliyi qarşıdurma haqda məlumatları təkzib edir.

Polis əməkdaşlarının sözlərinə görə, adamlar onlarla söhbətdən sonra dağılışıblar, Dünyamalıyev isə özünü asıb.-0-