Dövlət Torpaq və Xəritəçəkmə Komitəsi ləğv edilib

Prezident İlham Əliyev Dövlət Torpaq və Xəritəçəkmə Komitəsinin ləğv edilməsi barədə fərman imzalayıb.

Ləğv edilmiş komitənin funksiyası Dövlət Əmlak Məsələləri Komitəsi, Ekologiya və Təbii Sərvətlər Nazirliyi, Dövlət Sərhəd Xidməti arasında bölünüb. Bu barədə dövlət başçısının saytı məlumat verib.

Qərar qəbulu zamanı Azərbaycan Respublikası Konstitusiyasının 109-cu maddəsinin 32-ci bəndi rəhbər tutulub və  mülkiyyət hüquqlarının tənzimlənməsində vahid idarəçiliyi təmin etmək məqsədi daşıyır.

Fərmana görə, Dövlət Torpaq və Xəritəçəkmə Komitəsinin dövlət torpaq kadastrı, yerquruluşu, geodeziya, torpaq bazarının təşkili, dövlət torpaq reyestrini aparmaq, bələdiyyələrin elektron daşıyıcıda və kağız üzərində xəritəni, habelə rübdə bir dəfə bələdiyyələrin hüdudları daxilində dövlət, bələdiyyə və xüsusi mülkiyyətdə olan torpaq sahələrində baş vermiş dəyişikliklər barədə arayışı Azərbaycan Prezident Administrasiyasına təqdim etmək sahəsindəki funksiyaları Əmlak Məsələləri Dövlət Komitəsinə verilib.

Komitənin torpaqların monitorinqi, onların münbitliyinin bərpası və artırılması, geodeziya, topoqrafiya, xəritəçəkmə, qravimetriya, ərazi vahidlərinin sərhədlərinin müəyyən edilməsi, dövlət əhəmiyyətli coğrafi məlumat sistemlərinin yaradılması, ümumcoğrafi, torpaq, geobotaniki, siyasi-inzibati, elmi məlumat və digər sahələrarası mövzu xəritələrinin, atlaslarının, kartoqrafik tədris vasitələrinin layihələşdirilməsini, tətbiqini və nəşrini təmin etmək, dəqiqliyinə və məzmununa görə ümumdövlət, müdafiə, elmi-tədqiqat və digər məsələlərin həllini təmin edən dövlət topoqrafik xəritələrin, habelə qrafiki, rəqəmi, fotoqrafik və başqa formalı planların yaradılması, yeniləşdirilməsi, nəşri və geodeziya, qravimetriya, topoqrafiya və kartoqrafiya işlərinin həyata keçirilməsində, materialların istifadəsində dövlətin müdafiəsini və təhlükəsizliyini təmin etmək, vahid dövlət koordinat, yüksəklik, qravimetrik ölçmə sistemlərinin, topoqrafik xəritə və planların miqyas sıralarını təyin etmək və geodeziya, topoqrafiya və kartoqrafiya materiallarının və məlumatlarının metroloji təminatını həyata keçirmək sahəsindəki funksiyaları Ekologiya və Təbii Sərvətlər Nazirliyinə verilib.

Komitənin Azərbaycanın dövlət sərhədlərinin, o cümlədən sərhəd sularının və Xəzər dənizinin (gölünün) Azərbaycana mənsub olan bölməsinin delimitasiyası və demarkasiyası işlərini Ekologiya və Təbii Sərvətlər Nazirliyi Dövlət Sərhəd Xidməti ilə birlikdə həyata keçirəcək.

Nazirlər Kabinetinə tapşırılıb ki, fərmandan irəli gələn məsələlərə dair təklifləri iki ay müddətində hazırlayıb prezidentə təqdim etsin.

 “Torpaq Komitəsinin ləğvi islahatlar məsələsini bir daha aktuallaşdırdı”, - İqtisadi Təşəbbüslərə Yardım  Birliyinin İdarə Heyətinin sədri Azər Mehdiyev bildirib. Lakin bu məsələdə islahatlar paketi  formatında kompleks formada islahatlar aparmaq düzgün olardı. “Məsələn, bir çox ölkələrdə meşə təsərrüfatı, balıqçılıq, aqrar sektor Kənd Təsərrüfatı Nazirlyiinn səlahiyyətinə daxildir. Bizdə bu funksiyalar iki nazirlik arasında bölünüb”, - o qeyd edib.

Torpaq Komitəsi 1992-ci il iyulun 17-də yaradılıb.

2001-ci ildə Torpaq Komitəsi və Dövlət Geodeziya və Xəritəçəkmə Komitəsinin birləşməsi nəticəsində Dövlət Torpaq və Xəritəçəkmə Komitəsi yaradılıb. 2004-cü ildən onun rəhbəri Qərib Məmmədov olub.—0--