Əliyev Avropa Şurasının baş katibi ilə görüşdə AŞPA-da korrupsiya hallarından bəhs etməyib

Cümə axşamı prezident İlham Əliyev COP29 iqlim konfransında iştirak etmək üçün Bakıya gələn Avropa Şurasının Baş katibi Alen Berseni qəbul edib.

Prezidentin saytında yer alan məlumata görə, Berse qeyd edib ki, "Avropa Şurası ətraf mühitlə bağlı cinayətlərə və iqlim dəyişmələri ilə əlaqədar məsələlərə böyük əhəmiyyət verir və bunlar təşkilatın gündəliyində yer alıb".

O, həmçinin bildirib ki, "Avropa Şurası çərçivəsində dövlətlərin müxtəlifliyi prinsipi xüsusi əhəmiyyət daşıyır".

Əliyev, öz növbəsində, qeyd edib ki, Azərbaycan Avropa Şurasının 76 müxtəlif konvensiyasına qoşulub.

Görüşdə müxtəlif sahələrdə əməkdaşlıq məsələləri müzakirə olunub, Azərbaycanın təşəbbüsü ilə Avropa Şurası və İslam Əməkdaşlıq Təşkilatı arasında yaradılmış Bakı Prosesinin əhəmiyyəti vurğulanıb, deyə məlumatda bildirilir.

Maraqlıdır ki, Əliyev bir gün əvvəl COP29-da çıxış edərkən Avropa Şurası Parlament Assambleyasını "siyasi korrupsiyanın rəmzi" adlandırıb.