Dini saytın rəhbəri beş maddə üzrə ittiham olunur

Baş Prokurorluğun Ağır Cinayətlər üzrə Baş İdarəsində xeber44.com dini saytının redaktoru Araz Quliyevin barəsində cinayət işi üzrə istintaq başa çatıb. İş baxılmaq üçün məhkəməyə göndərilib. Bu barədə Turan-a vəkil Fariz Namazlı məlumat verib.

A.Quliyev sentyabrın 8-də Masallı rayonunda dindarların aksiyasını işıqlandıran zaman saxlanılıb. Aksiya iştirakçıları folklor festivalında rəqqasələrin çıxışlarına və diskotekanın təşkilinə etirazlarını bildiriblər. A.Quliyev və bir neçə iştirakçı xuliqanlıqda ittiham olunaraq saxlanılıb.

Lakin sonradan bu ittiham A.Quliyevin üzərindən götürülüb, onun əvəzinə 5 yeni maddə üzrə ittiham irəli sürülüb:    228 (qanunsuz silah saxlama), 233 (ictimai asayişin pozulması), 283 (millətlərarası ədavətin qızışdırılması), 315.2 (silah tətbiq etməklə polisə müqavimət göstərmək)

və 324 (Azərbaycan bayrağının təhqir olunması).

Jurnalist qanunsuz silah saxlamaq da daxil olmaqla, bütün ittihamları rədd edir. İstintaqın məlumatına görə, onun evində qumbara aşkar edilib, lakin müttəhim bildirir ki, qumbaranı onun evinə atıblar.

Həmçinin vəkil ittihamların əsassız olduğunu və istintaq zamanı prosessual pozuntulara yol verildiyini bildirib. Bundan əlavə, A.Quliyev saxlandıqdan sonra Masallı rayon polisində döyülüb.

F.Namazlı qeyd edib ki, A.Quliyevin cinayət işinin dayandırılması və azad edilməsi barədə vəsatət qaldırıb.—06B-