Moldova qiymətli kağızlar bazarının formalaşdırılması üzrə Azərbaycan təcrübəsini öyrənir

Bu gün Moldova nümayəndə heyəti qiymətli kağızlar bazarının formalaşdırılması üzrə Azərbaycan təcrübəsini, ona nəzarət və 2020-ci ilə kimi inkişaf perspektivini öyrənmək üçün Bakıya gəlir. Bu barədə Turan-a  Qiymətli Kağızlar üzrə Dövlət Komitəsində məlumat veriblər. Nümayəndə heyətinə  Moldova Respublikasının Parlamentinin deputatı, İqtisadi Məsələlər üzrə Komissiyasının üzvü Yuri Apostalaki rəhbərlik edir. Nümayəndə heyətinin tərkibinə Moldova Respublikasının Maliyyə Bazarları üzrə Komissiyasının, Milli Bankının, Fond Birjasının, Milli Depozitarın əməkdaşları daxildir. 20 dekabra qədər davam edəcək səfərdə qonaqlar Azərbaycan qiymətli kağızlar bazarında peşəkar iştirakçıların lisenziyalaşdırılması, fəaliyyətlərinə nəzarət və onların  hesabatlılıq sistemi, qiymətli kağızların emissiyası, ticarəti, tədavülünə nəzarət, eləcə də qiymətli kağızların saxlancı və qeydiyyatı üzrə Azərbaycan təcrübəsi ilə yaxından tanış ediləcək.

Moldovanın QK bazarı Azərbaycanınkına oxşayır. Bu ölkədə səhm bazarı və dövlət qiymətli kağızlar bazarı daha mütəşəkkildir. Moldovanın Fond Birjası birja dövriyyəsində iştirak edən mindən çox müəssisənin səhmlərimnin alqı-satqısı əqdlərinin həyata keçməsini təmin edir. Korporativ istiqrazların yerləşdirilməsi və dövriyyəsi populyar deyil. DQK-ya gəlincə, buraya qısa müddətə buraxılan xəzinə vekselləri, 2 ilədək müddəti olan dövlət istiqrazları daxildir. 08D