Dövlət başçısı İlham Əliyev Olimpiya stadionu ətrafındakı tikintilə tanış olub

Dövlət başçısı İlham Əliyev çərşənbə günü Bakı Olimpiya Stadionu ətrafında inşası davam etdirilən yol-nəqliyyat infrastrukturunun tikintisi ilə tanış olub.

Nəqliyyat naziri Ziya Məmmədov dövlət başçısına Həsən Əliyev küçəsi - Ziya Bünyadov prospekti-Olimpiya Stadionu avtomobil yolunun birinci hissəsində tikinti işlərinin qrafik üzrə davam etdiyini söyləyib. Layihə çərçivəsində işlərin böyük hissəsi artıq görülüb.

Çəkilən ikinci yolun ümumi uzunluğu 1 kilometrdir, hərəkət hissəsi 2-6 zolaqlıdır. Yol boyunca 3 körpü inşa edilib, birinci körpünün uzunluğu 205, ikinci körpünün uzunluğu 176 metr, piyadalar üçün nəzərdə tutulan üçüncü körpünün uzunluğu isə 143 metrdir. Bundan başqa, uzunluğu 900 metrə yaxın olan piyada keçidi inşa edilib, iki tunel tikilib.

Nazir Həsən Əliyev küçəsi - Ziya Bünyadov prospekti-Olimpiya Stadionu avtomobil yolunun ikinci hissəsinin tikintisi barədə də məlumat verib. Layihə çərçivəsində ümumi uzunluğu 5 kilometrə yaxın olan yol çəkilib, yol boyunca bir körpü və iki tunel tikilib. Tuneldən keçən yollar Bakı Olimpiya Stadionu ilə Olimpiya şəhərciyini birləşdirir.

Sonda dövlət başçısı inşaat işlərinin yüksək səviyyədə aparılması ilə bağlı tapşırıqlarını verib. -05D-