Dövlət Departamenti: ABŞ Azərbaycanda siyasi məhbusların azad edilməsi üçün addımları davam etdirəcək

Çərşənbə günü Vaşinqton bildirib ki, siyasi məhbusların azad edilməsi üçün Azərbaycana təzyiqləri davam etdirir. "Bizim insan hüquqlarını müdafiə etməmiz heç bir konfransla bağlı deyil. Bu gündəlik baş verən bir şeydir; COP29-dan əvvəl başlayıb və ondan sonra da davam edəcək",  - Dövlət Departamentinin nümayəndəsi Metyu Miller brifinqdə bildirib. O, bunu “COP29 Azərbaycanda siyasi məhbusların azad edilməsi üçün "itirilmiş fürsət" oldumu?” sualının cavabında deyib.

Əsasən, “Azadlıq” radiosu ilə əməkdaşlıq edən və beş aydır ki, "xarici valyuta qaçaqmalçılığına" görə həbsdə olan Fərid Merhalizadənin taleyilə bağlı sual verilib. O və onun işəgötürəni bu ittihamları rədd edirlər.

"Biz Azərbaycan hökumətinə aydın şəkildə işarə etdik ki, onlar jurnalistlərin öz işlərilə məşğul olmaq hüquqlarına hörmət etməlidirlər", -Miller deyib.

İyunun 1-də Bakı məhkəməsi müstəqil KİV olan “Abzas Media”ya   qarşı qaldırılan iş ilə əlaqədar Mehralızadəni həbs edib. Bir ay sonra hakimiyyət ona qarşı "qanunsuz sahibkarlıq, pulların yuyulması, vergidən yayınma və sənədlərin saxtalaşdırılması" ittihamlarını irəli sürüb. İrəli sürülən bütün ittihamlarla onu 12 ilə qədər həbs təhlükəsi gözləyir. Ötən ay "Azadlıq” radiosu onun azad edilməsinə çağıran bəyanat yayıb.

Brifinq zamanı tanınmış alim və korrupsiyaya qarşı mübarizə üzrə ekspert,  xaricdən gəldikdən sonra siyasi motivlərlə həbs edilmiş doktor Qubad İbadoğlunun barəsində də sual verilib.

Noyabrın əvvəlində ABŞ-ın 30-a yaxın yüksək vəzifəli qanunvericisi dövlət katibi Entoni Blinkenə və prezidentin iqlim məsələləri üzrə baş məsləhətçisi Con Podestaya məktub göndərərək COP29 konfransından əvvəl İbadoğlunun azad edilməsi üçün Azərbaycan hökuməti ilə birbaşa qarşılıqlı əlaqəni davam etdirməyi xahiş edib.

Azərbaycan hökuməti insan hüquqlarının pozulması ilə bağlı beynəlxalq təşkilatların tənqidlərini qəbul etmir və ölkədə siyasi məhbusların olmadığını bildirir.