Dövlət Departamenti Bakı-Yerevan dialoqunda "yüksək səviyyədə" iştirakı davam etdirməyə söz verir

Vaşinqton/12.10.22/Turan: Çərşənbə axşamı Vaşinqton Azərbaycan və Ermənistan arasında münaqişənin nizamlanması üzrə sülh prosesində "ABŞ-ın yüksək səviyyədə iştirakını" davam etdirəcəyinə söz verib, bu barədə Turan-ın Amerikadakı müxbiri xəbər verib. 

Dövlət katibi Entoni Blinken bu yaxınlarda iki tərəf arasında son qarşıdurmaların dayandırılması və atəşkəsin təmin edilməsi üzrə səylərdə əsas rolu öz üzərinə götürüb.

O, bazar ertəsi Azərbaycan və Ermənistan liderləri ilə danışıqları zamanı sərhədin delimitasiyası prosesinə, nəqliyyat əlaqələrinin təmin edilməsinə, itkin düşmüş şəxslərin axtarışına və kimliyinin müəyyən edilməsinə, saxlanılan şəxslərin qaytarılmasına və digər məsələlərə ABŞ-ın dəstəyini təsdiq edib.

Brifinqdə Turan-ın müxbirinin dövlət katibinin yaxın həftələrdə və ya aylarda bu münaqişəni öz işləri siyahısına daxil etməyə hazır olub-olmadığı haqqında sualına cavabda Dövlət Departamentinin nümayəndəsi Ned Prays deyib ki, qeyd edilən müddətdə "Amerikanın bu prosesdə yüksək səviyyədə iştirakının davam etdiyini" görmək olar.

"Dünən dövlət katibi Ermənistan və Azərbaycan liderləri ilə danışıb. Bu məsələ üzrə baş müşavirimiz Fil Riker hər iki ölkənin məsul şəxsləri ilə hər gün əlaqə saxlayır. Odur ki, biz bu məsələ ilə məşğul olmağa davam edəcəyik. Vaşinqton konkret nəticə vəd edə bilməsə də, söz verə bilərəm ki, bu məsələ bizim üçün prioritet olaraq qalacaq", deyə Prays qeyd edib. 25B