Rusiya Ukrayna şəhərlərini bombalayarkən G7 və NATO buna cavab verir

Vaşinqton/12.10.22/Turan: Rusiyanın Ukraynaya raket hücumlarının güclənməsi fonunda NATO və G7 liderləri Kiyevə dəstəyi gücləndirməyi vəd edirlər.

"Heç bir təqsiri olmayan mülki əhaliyə qarşı hədəfi seçilməyən hücumlar Rusiya qüvvələrinin hərbi cinayətidir", deyə G7 liderlərinin çərşənbə axşamı yaydığı birgə bəyanatda bildirilir. 

Qərb Vladimir Putini və Ukraynaya qarşı hücuma görə məsuliyyət daşıyan hər kəsi məsuliyyətə cəlb etməyi vəd edir. Liderlər həmçinin bildiriblər ki, Ukraynaya maliyyə dəstəyi, humanitar, hərbi, diplomatik və hüquqi dəstək göstərməyə davam edəcəklər və "lazım olduğu müddətcə Ukraynanın yanında dayanacaqlar".

Vaşinqtonda Dövlət Departamentinin nümayəndələri sonuncu raket hücumlarını amansız təcavüzkar müharibə kimi qiymətləndirdiklərini bildiriblər. "Kremlin hücumları amansız və tamamilə əsassız idi, amma onlar həm də zəifliyin və çarəsizliyin əlamətidir", deyə mətbuat katibi Ned Prays gündəlik brifinqdə bildirib.

"Biz Rusiyanın etdiklərini diqqətlə izləyirik. Bilirik ki, o, heç bir əsas olmadan hərbi cinayətlər törədib", deyə o bildirib.

Brüsseldən ayrıca brifinqdə jurnalistlər qaşısında çıxış edən ABŞ-ın NATO-dakı səfiri Culi Smit alyansın Ukraynaya dəstəyini təsdiq edib.

"Müttəfiqlərin humanitar, iqtisadi yardım və təhlükəsizlik sahəsində yardım vasitəsilə Ukraynaya dəstəyə sədaqətlərində heç bir dəyişiklik görmürəm. 30 müttəfiq Putin müharibəsinin beynəlxalq ictimaiyyəti və BMT Nizamnaməsini təhqir etməyə davam etdiyi fikrində yekdildirlər", deyə o bildirib.

Turan-ın Vaşinqtondakı müxbirinin alyansın Ukraynanı qorumaq üçün nə etdiyi haqqında sualına cavabda Smit deyib ki, ABŞ "müharibə ərəfəsində - fevralın 24-nə qədər müttəfiqləri ilə birlikdə əldə etdiyi misilsiz həcmdə kəşfiyyat məlumatlarını paylaşıb və bu, indi də davam edir".

"Amma mən onu da qeyd etmək istərdim ki, NATO təkcə silahlarla dəstək göstərmir, bu, qış təchizatı, gecə eynəkləri, generatorlar, yanacaq və s. kimi əşyalara da aiddir", deyə o əlavə edib.

ABŞ öz növbəsində Ukraynaya milli qabaqcıl zenit-raket komplekslərinin (NASAMS) tədarükünü "mümkün qədər tezləşdirmək" öhdəliyi götürüb, deyə Ağ Evin rəsmi nümayəndəsi Con Kirbi bildirib.

Kirbi NASAM-ın göndəriləcəyi konkret tarixi açıqlamayıb, amma ABŞ-ın "sistemlərin tədarükünün sürətləndirilməsində çox maraqlı olduğunu" bildirib. 0