Tbilisidə "Müharibə dövründə media" mövzusunda regional konfrans başlayıb

Bakı/12.10.22/Turan: "Müharibə dövründə media" - oktyabrın 12-də Tbilisidə başlayan regional konfransın mövzusu belədir.

Turan-ın xüsusi müxbirinin Tbilisidən verdiyi məlumata görə, tədbir Avropa Şurası tərəfindən Aİ-nin Şərq Tərəfdaşlığı proqramının iştirakçısı olan ölkələrin - Azərbaycan, Ermənistan, Gürcüstan, Moldova və Ukraynanın KİV nümayəndələri, media üzrə ekspertlər, vətəndaş cəmiyyəti fəalları üçün təşkil olunub.

Forumun keçirilməsi zərurəti Ukraynada davam edən və təkcə bu ölkədə deyil, bütün regionda media mühitinə güclü təsir edən müharibə ilə əlaqədar yaranıb.

İnformasiya müharibəsinin və təbliğatın güclənməsi regional media landşaftına əhəmiyyətli dərəcədə təsir edir. 

2022-ci ilin fevralından jurnalistlər və media qurumları KİV-lərdə dezinformasiyaya, ədavətin və təbliğatın güclənməsinə qarşı mübarizə aparmaq problemi ilə qarşılaşırlar.

Konfransın gündəliyində "24 fevral 2022-yə qədər və bu tarixdən sonra Ukraynada KİV-lər", "KİV-də ədavət dili: Rusiyanın Ukraynaya qarşı təcavüzü mövcud çağırışları sürətləndirib", "Müharibə dövründə jurnalistlərin təhlükəsizliyi", "Müharibə və silahlı münaqişələr zamanı KİV-lərin tənzimlənməsi", "İnformasiya qarışıqlığına və təbliğata qarşı mübarizə", "Münaqişənin KİV-də işıqlandırılması" kimi mövzular var.

Konfransın yekunlarına görə region ölkələrinin media qurumları üçün tövsiyələrin işlənib hazırlanması nəzərdə tutulur.

Konfrans çərçivəsində "Rusiyanın Ukraynaya qarşı təcavüzkar müharibəsi: jurnalistlərin işi" mövzusunda fotosərgi keçirilir, həmçinin Kann Festivalına təqdim edilmiş "Mariupol-2" sənədli filmi nümayiş olunacaq. 06С