Dövlət Departamenti Kremldən ruhlanan qanun ABŞ-Gürcüstan münasibətlərini "pozacaq"

Bazar ertəsi ABŞ Gürcüstana bir daha xəbərdarlıq edib ki, kütləvi etirazlara səbəb olan "Xarici agentlər haqqında" qanunu irəli sürərək ABŞ və Avropa İttifaqı ilə münasibətləri riskə atır. 

"Biz təkid etməyə davam edirik ki, "Xarici agentlər haqqında" qanun Gürcüstanın Avroatlantika yolunu təhlükə altına alacaq və ABŞ ilə münasibətləri pozacaq", - Dövlət Departamentinin rəsmi nümayəndəsi Metyu Miller brifinqdə Turan-ın suallarını cavablandırarkən bildirib.

Hakim Gürcü Arzusu Partiyasının Kremlin ruhlandırdığı qanunu irəlilətmək cəhdləri və onun antiqərb ritorikası Gürcüstan-Amerika icmasının Gürcüstan hakimiyyətinə qarşı sanksiyalar tətbiq etməyə çağırmasına səbəb olub.

“Bayden administrasiyası Gürcüstanın Rusiyapərəst rəhbərlərinə qarşı hər hansı tədbiri nəzərdən keçiribmi?” sualına  Miller belə cavab verib: "Mən sanksiyalar və nə edə biləcəyimiz və ya nə etmək niyyətində olduğumuz barədə açıqlama verməyəcəyəm".

Ötən həftə ABŞ-ın 14 senatorundan ibarət ikipartiyalı qrup Gürcüstanın baş naziri İrakli Kobaxidzeyə məktub göndərərək xəbərdarlıq edib ki, əgər "Xarici agentlər haqqında" qanun layihəsi qanuna çevrilərsə, onlar ABŞ-ın Gürcüstanla bağlı siyasətini dəyişməyə, birbaşa dövlət maliyyələşdirilməsinin dayandırılmasına və viza məhdudiyyətlərinin tətbiqinə çağırmağa məcbur olacaqlar.