Dövlət Departamenti QHT-yə olan iradları rədd edir

ABŞ Dövlət Departamentinin rəsmi nümayəndəsi Viktoriya Nuland bazar ertəsi keçirilən gündəlik brifinqdə bildirib ki, Amerikanın qeyri-hökumət təşkilatları öz fəaliyyətində qanun çərçivəsində kənara çıxmırlar. 

Bununla o, Azərbaycan hökumətinin ABŞ Milli Demokratiya İnstitutunun Bakıdakı fəaliyyətinə dair iradları ilə bağlı “Amerikanın səsi”nin sualını cavablandırıb.

Rəsmi Bakının iradları haqda informasiyasının olmadığını diplomatik şəkildə qeyd edən Nuland eyni zamanda deyib ki, “ABŞ tərəfindən maliyyələşdirilən demokratik layihələrin hamısı kifayət qədər ciddi çərçivədə fəaliyyət göstərir və hər hansı konkret partiyanı və ya ideoloji xətti maliyyələşdirmir”. 

O həmçinin qeyd edib ki, Amerika QHT-ləri demokratik seçki prosesinə və balans əsasında bütün siyasi spektrin partiya quruculuğuna maliyyə dəstəyi göstərir.

Bundan öncə ABŞ səfirliyi və NDI bu ittihamları rədd edərək bildiriblər ki, “Milli Demokratiya İnstitutu və onun direktoru şəffaflıq şəraitində Azərbaycanın vətəndaş cəmiyyətini və ölkənin demokratik inkişafını dəstəkləyir”.

Məlum olduğu kimi, martın 10-da əsgər ölümlərinə etiraz olaraq gənclərin icazəsiz aksiyasından sonra Prezident Administrasiyasının rəhbəri Ramiz Mehdiyev KİV-ə istinadla 

NDI-i destruktiv fəaliyyətdə və yerli qanunvericiliyin pozulmasında ittiham edib.

NDI-in fəaliyyətinin maliyyə tərəfi, əsasən onun Bakıdakı nümayəndəsi Aleks Qriqoryevs haqqında informasiya jurnalist Eynulla Fətullayevin Haqqin.az saytı vasitəsilə yayılıb. Jurnalist bildirib ki, gənclərin “Facebook inqilabı”na 2 mln. dollar sərf edilib.

Sonradan məlum olub ki, gənclər təşkilatlarına qrant kimi ayrılan vəsait 2010-12-ci illərdə 1 mln. dollardan bir qədər çox və ya ildə 270 min manat təşkil edib.  Bu, Azərbaycan hökumətinin öz gənclər təşkilatlarının dəstəklənməsi üçün ayırdığı vəsaitdən astronomik şəkildə azdır. Ötən il “gənclərin ictimai həyatda fəal iştirakına, vətənpərvərlik tərbiyəsinə və beynəlxalq əməkdaşlığın genişləndirilməsinə” yönələn layihələrə Gənclər və İdman Nazirliyinin xətti ilə 20 mln. manat ayrılıb.  İlin yekunlarına görə, sərf olunan vəsaitin effektivliyi Prezident Administrasiyasının ictimai-siyasi şöbəsinin müdiri Əli Həsənov tərəfindən şübhə altına alınıb.—0—