DQMM Ümummilli konqres çağırılmasını zəruri sayır

Demokratik Qüvvələrin Məşvərət Məclisi (DQMM) çərşənbə axşamı Klassik Xalq Cəbhəsi Partiyasının (KXCP) qərargahında toplantı keçirib. 

DQMM-nin piket keçirmə barədə Bakı şəhər icra hakimiyyətinə müraciətinin təmin olunmaması və aksiya təşkilatçılarının polisə çağırılması haqda məlumat verilib. Hüquqşünas və seçki mütəxəssislərinin seçki islahatı ilə bağlı Memorandum hazırlaması vaxtında atılmış addım sayılıb. Bununla bağlı toplantıda Ziyalılar Forumu, Məşvərət Məclisi, İctimai Palata, Qarabağ bloku, Real hərakatı və s. demokratik qüvvələrin fəaliyyətini əlaqələndirmək üçün Ümummilli konqres çağırılması zəruri sayılıb.

Beynəlxalq universitetin sabiq rektoru Elşad Abdullayevin ölkədə ən yüksək səviyyədə korrupsiya və rüşvət faktlarını ortaya qoymasına toxunulub. İqtidarın faktları ört-basdır etməsinin, cinayət iştirakçılarını ölkədən “qaçırması”nın ciddi narahatlıq doğurduğu vurğulanıb. Azərbaycanda hakimiyyətin kriminal bir qrupun əlinə keçməsi təəssüratı yarandığı üçün dövlət başçısından bu məsələyə qəti mövqe bildirməsi tələb edilir.  

65 il əvvəl azərbaycanlıların Ermənistandan kütləvi şəkildə departasiya olunması müzakirə edilib və bu məsələ ilə bağlı tədbirlər keçirilməsi təklifləri səslənib. Bu məsələ ilə bağlı Təşkilat Komitəsi yaradılıb və dekabrın 12-də KXCP-nin qərargahında tədbir keçirilməsi qərara alınıb. -05D-