Dunya Miyatoviç yenidən Azərbaycan hakimiyyətini həbs edilmiş jurnalistləri azad etməyə çağırdı

ATƏT-in KİV azadlığı üzrə nümayəndəsi Dunya Miyatoviç cümə günü Azərbaycana rəsmi səfəri çərçivəsində Bakıda yüksək vəzifəli məmurlarla KİV azadlığı məsələlərini müzakirə edib. O, həmçinin həbsdə olan jurnalistlərə baş çəkib, bu barədə ATƏT-in press-relizində bildirilir.

“Bu görüşlər zamanı Azərbaycanda bütün məhbus jurnalistlərin və blogerlərin ən qısa zamanda azad ediləcəyinə ümid etdiyimi bildirdim və əvvəllər də hakimiyyət qarşısında qaldırdığım məsələlərlə bağlı narahatlığımı bildirdim. Bu, jurnalist İdrak Abbasova hücum, Xədicə İsmayılovaya qarşı qarayaxma kampaniyası və “Azadlıq” qəzetinin taleyi məsələləri idi. Mən həmçinin hakimiyyətin Azərbaycanda KİV üçün təhlükəsiz və azad mühiti təmin etməsi zərurətini qeyd etdim, çünki peşəkar jurnalistika yalnız jurnalistlərin öz vəzifələrini qorxusuz yerinə yetirdikləri zaman çiçəklənə bilər”, deyə o bildirib. “Ən yaxın gələcəkdə bu, Elmar Hüseynovun və Rafiq Tağının qatillərinin nəhayət ki, məhkəmə qarşısına çıxarılmasında  özünü göstərəcək. Jurnalistlərə basqınlar, habelə KİV-in sıxışdırılması və ya qorxudulması cəhdləri hakimiyyət tərəfindən kəskin şəkildə pislənəcək və araşdırılacaq. Uzaq gələcəkdə qanunvericilik bazasında dəyişikliklər mütləqdir. Artıq bəzi addımların atıldığını, xüsusən, Azərbaycanın tezliklə diffamasiyaya görə cinayət məsuliyyətini ləğv edəcəyini eşitmək sevindirdi. Bu, daha çox KİV azadlığı və qorxunun azaldılması istiqamətində mühim addım olardı”, deyə Miyatoviç qeyd edib.

ATƏT nümayəndəsi həmçinin çap KİV-lərində reklamın paylaşdırılması sistemini və İnternet azadlığı məsələlərini müzakirə edərək, hakimiyyəti İnternet azadlığını təmin etməyə çağırıb.

Miyatoviç səfər zamanı xarici işlər naziri Elmar Məmmədyarov, daxili işlər naziri Ramil Usubov, Prezident Administrasiyasının ictimai-siyasi şöbəsinin müdiri Əli Həsənov və beynəlxalq münasibətlər departamentinin rəhbəri Novruz Məmmədovla görüşüb.

Miyatoviçin həbs edilmiş jurnalistlər Əvəz Zeynallı (“Xural” qəzetinin redaktoru), müstəqil jurnalist Fərəməz Novruzoğlu (Allahverdiyev), “Xəyal TV”-nin icraçı direktoru Vüqar Qonaqov və “Tolışi Sədo” qəzetinin redaktoru Hilal Məmmədova baş çəkməsinə icazə verilib. Bu gün Dunya Miyatoviç Mətbuat Şurası ilə birgə keçirilən kütləvi tədbirləri işıqlandıran jurnalistlərin təhlükəsizliyi üzrə treninqdə iştirak edəcək.

Xatırladaq ki, dünən hakimiyyət Avropa Komissiyasının vitse-prezidentinin məhbus jurnalistlərə baş çəkməsinə etiraz edib və bu, qalmaqala səbəb olub. Vitse-prezident bildirib ki, ona belə bir imkan yaradılması xahişi ilə şəxsən prezidentə müraciət edib, o isə bunun üçün şərait yaradılacağını vəd edib. Lakin növbəti gün onu jurnalistlərlə görüşdürməkdən imtina ediblər. -02D-