Ədliyyə Nazirliyi ictimai birliyi qeydə almaqdan imtina edib

“Azəri-Talış” Milli-Mənəvi Dəyərlər” ictimai birliyinin sədri Mehdibəy Səfərov cümə axşamı RATİ-də qurumun dövlət qeydiyyatına alınmaması ilə bağlı mətbuat konfransı keçirib.  

Adı çəkilən qurum 2012-ci ilin noyabrında təsis edilib. Onun əsas məqsədi talış dili və mədəniyyətini qoruyub inkişaf etdirmək, ölkədə yaşayan xalqlarla dost münasibət yaratmaq, dövlətçiliyi müdafiə etməkdir.   

Qurum fəaliyyətə başladığı 5 ay ərzində dövlət qeydiyyatına alınması üçün Ədliyyə Nazirliyinə iki dəfə müraciət edib. Amma nazirlik ictimai birliyi qeydiyyata almayıb. M.Səfərov qurumun qeydiyyata alınmaması ilə bağlı nazirliyin “arqumentlər”ini əsassız sayıb. Belə ki, nazirlik qeydiyyat üçün qurumun verdiyi ərizənin notarial qaydada təsdiq olunmamasını əsas gətirib. Həm də nazirlik bu cavabı qurum təsisçilərinə sənədlər veriləndən düz iki ay yarım sonra bildirib. Təkrar müraciətlər olsa da, qurum qeydiyyata alınmayıb. Qurum rəhbərliyinin Prezident Administrasiyasına bu məsələ ilə bağlı müraciəti də nəticəsiz qalıb. Qurumun digər təsisçisi Eldəniz Quliyev qeyd edib ki, qeyri-rəsmi söhbətlərdə qurumun adından “talış” sözünün götürülməsi nəzərlərinə çatdırılıb. Digər tərəfdənsə, təsisiçilər YAP icra katibi Əli Əhmədovun, bəzi deputatların quruma münasibətdə tutduqları mövqeyin də qeydiyyata alınmasına problemlər yaratdığını deyiblər.

Qurum rəhbərliyi Ədliyyə Nazirliyini məhkəməyə vermək qərarına gəlib. Bu da nəticə verməsə, perspektivdə Avropa Məhkəməsinə müraciət olunması nəzərdə tutulur. Qurum rəhbərliyi birliyin dövlət qeydiyyatına yaradılan süni maneələrlə bağlı dövlət başçısı İlham Əliyevə açıq məktubla müraciət edib. M.Səfərov Azərbaycanda azsaylı xalqların hüquqlarının təmin olunması ilə bağlı 1992-ci ildə qanun qəbul olunduğunu yada salıb. “Ya Azərbaycan iqtidarı bu qanunun qüvvədən düşdüyünü elan etməlidir, ya da bu qanunun tələblərinə əməl etməlidir”, - deyə qanuna hörmətsizlik yaşandığını bildirib. Qurum rəhbərliyi Lənkəranda yayımlanan “Cənub TV”də talış dilində, talış mədəniyyətilə bağlı proqram yayılması haqda təklif səsləndirdiklərini də nəzərə çatdırıblar. Amma rəsmi Bakı tərəfdən buna müsbət reaksiya olmayıb. 

Qurum rəhbərliyi işğal altında olan Şuşada “Talişistani sədo” radio yayımını kəskin pisləyib. Bununla erməni tərəfin Azərbaycan daxilinə milli zəmində nifaq salmaq, onsuz da kifayət qədər problem yaşayan İran-Azərbaycan münasibətlərinə daha bir problem artırmaq kimi hədəf seçmələrinə diqqət çəkib. Bu radionun səsinin boğulması üçün qurğular quraşdırılmasına diqqət çəkilib. 

“Rəsmi Bakı ölkə daxilində talış dilində bir neçə saatlıq verilişə imkan versəydi, bu qurğuları yaratmağa ehtiyac olmazdı”, - deyə iqtidarı yanlış mövqe tutmaqda ittiham ediblər. -05C-