Əfqan Sadıqov Gürcüstan İstintaq Təcridxanasında aclıq elan edib

Gürcüstanda həbsdə olan Azel TV Azərbaycan saytının rəhbəri Əfqan Sadıqov sentyabrın 20-də İstintaq Təcridxanasında aclıq elan edib. Bu barədə Turan-a onun həyat yoldaşı Sevinc Sadıqova bildirib. 

Onun sözlərinə görə, Ə.Sadıqov əsassız cinayət təqibinə etiraz əlaməti olaraq aclıq edir və azad olunmasını tələb edir.

"Əfqan bildirdi ki, Gürcüstan hökuməti, bu ölkənin məhkəməsi onunla bağlı ədalətli qərar verməyib. Məhkəmələr təqdim olunan sübutlara və faktlara qiymət vermədən ədalətsiz qərarlar çıxardı. Gürcüstan məhkəmələri Azərbaycanda jurnalist barəsində qaldırılan saxta cinayət işi ilə bağlı müraciəti qüvvədə saxlayıb onun ekstradisiyasına qərar verib. O dedi ki, Gürcüstan Miqrasiya Xidmətinin ədalətli qərar verəcəyini düşünüb. Amma Miqrasiya Xidməti də heç bir araşdırma aparmadan məhkəmənin qərarını qüvvədə saxlayıb. O bildirdi ki, Azərbaycanda və Gürcüstanda qanunlar işləmirsə, başqa çıxış yolu görmür. Bu səbəbdən aclıq aksiyasına başladığını bəyan etdi", deyə Sadıqova qeyd edib. 

Onun sözlərinə görə, jurnalist barəsində ədalət bərpa olunanadək aclığı davam etdirəcəyini deyib.

Sevinc Sadıqova özünün və uşaqlarının da həyatının təhlükədə olduğunu deyib.

"Bizi addım-addım izləyirlər. Bunun arxasında Azərbaycan hökumətinin dayandığını düşünürük. Qorxu içərisində yaşayırıq. Təhlükəsizliyimiz üçün təhdid olduğuna görə uşaqları məktəbə də buraxmıram", deyə o bildiri. 

Əfqan Sadıqov Azərbaycana deportasiya oluna bilər. Azərbaycan Baş Prokurorluğundan müvafiq sorğu iyul ayında daxil olub. Sorğuda deyilir ki, Sadıqova qarşı mayın 10-da pul tələb etmə ittihamı ilə cinayət işi açılıb. Məhkəmənin qərarı ilə onun barəsində axtarış elan olunub.

Xatırladaq ki, Sadıqov 2023-cü ilin dekabrında təqibə məruz qalacağından ehtiyatlanaraq ailəsi ilə birlikdə Gürcüstana köçüb. İyulun ortalarında o, Gürcüstandan Türkiyəyə buraxılmayıb, yalnız Azərbaycana gedə biləcəyi ildirilib.