Əfqan Sadıqovun həbsindən apellyasiya şikayəti verilib

Tbilisidə həbs edilən Əfqan Sadıqovun ailəsi onun taleyindən narahatdır, çünki həbs olunduqdan sonra o, qohumlarına bir dəfə də olsun zəng etməyib. Bu barədə “Turan”a onun həyat yoldaşı Sevinc Sadıqova məlumat verib.

Öz növbəsində, Ə.Sadıqovun vəkili Dmitri Nozadze “Turan”a bildirib ki, onunla təcridxanada görüşüb. Onun sözlərinə görə, Ə.Sadıqov Gürcüstanın miqrasiya orqanlarından onun beynəlxalq müdafiə ilə təmin olunması üçün köməklik istəyib.

Vəkil bu gün də həbsdən apellyasiya şikayəti verib.

Vəkil bildirib ki, yaxınları ilə telefon danışığı və ziyarətin mümkünsüzlüyünə gəlincə, bu hüquqlar həbslə bağlı sənədləşmə işləri başa çatdıqdan sonra təmin olunacaq.

Xatırladaq ki, “Azel TV” şirkətinin təsisçisi Əfqan Sadıqov Azərbaycan prokurorluğunun tələbi ilə avqustun 3-də Tbilisidə saxlanılıb.

Avqustun 4-də məhkəmə onu Azərbaycana ekstradisiyası üçün iki ay müddətinə həbs edib, orada ona qarşı hədə-qorxu ilə tələb etmə maddəsi ilə cinayət işi açılıb.

Sadıqov ittihamı rədd edir və hakimiyyəti tənqid etdiyinə görə cəzalandırılması üçün ona qarşı cinayət işi qurulduğunu düşünür.

Sadıqov bundan əvvəl Azərbaycanda iki dəfə cinayət məsuliyyətinə cəlb edilib və iki dəfə həbs cəzasına məhkum edilib. Hər iki dəfə hüquq müdafiəçiləri onu siyasi məhbus kimi tanıyıblar.