Gürcüstanın qeyri-hökumət təşkilatları və media Əfqan Sadıqovun müdafiəsinə qalxıblar (yenilənib)

“Azel” TV saytının rəhbəri Əfqan Sadıqovun məhkəməsində Gürcüstan Sosial Ədalət Mərkəzi onun ev dustaqlığına buraxılması barədə vəsatəti dəstəkləyib.

Bundan əlavə, Gürcüstanın 6 media orqanı zamin kimi çıxış edərək bildirib ki, Sadıqov azad olunarsa, gizlənməyəcək, Turan-a Mərkəzin proqram direktoru Tamta Mikeladze bildirib.

O qeyd edib ki, Sosial Ədalət Mərkəzi Sadıqovun qanuni maraqlarını təmin edir və vəkilləri onun  müdafiəsinə cəlb edib.

"Sosial Ədalət Mərkəzi məhkəməyə sübutlar təqdim edib. Bir tərəfdən, bunlar Azərbaycanda Əfqan Sadıqovun ünvanına ittihamların açıq-aşkar əsassız olduğunu sübut edir, digər tərəfdən, onun peşə fəaliyyətilə əlaqədar  Azərbaycan hakimiyyəti tərəfindən ayrı-seçkilik təqibinə məruz qalmasına  dair tamamən əsaslandırılmış fərziyyəni göstərir.  Bundan əlavə, təşkilat tibbi sənədlər təqdim edib ki, bu da qanunsuz həbs edilmiş jurnalistin səhhətinin ağır olduğunu, onun qaçması və ədalət mühakiməsinin həyata keçirilməsinə mane olması barədə bəhanələrin yersiz olduğunu göstərir", - Mikeladze bildirib.

Azərbaycanda jurnalistlərin və fəalların hüquqi vəziyyətinin olduqca mürəkkəb və kritik olduğu şəraitdə məhkəmə nəzərə almalıdır ki, əfqan Sadıqovun Azərbaycana ekstradisiyası onun hüquqlarının pozulmasına səbəb ola bilər.

Lakin məhkəmə müdafiə tərəfinin və Əfqan Sadıqovun zaminlərinin dəlillərini qəbul etməyərək onu həbsdə saxlayıb.

* * *

Əfqan Sadıqovun vəziyyətinin ağır olmasına baxmayaraq, Tbilisi məhkəməsi onu həbsdə saxlayıb

Tbilisi Şəhər Məhkəməsi Azərbaycanın  Azel.Tv saytının rəhbəri əfqan Sadıqovu ev dustaqlığına buraxmaqdan imtina edib. Sadıqovun səhhətinin pisləşməsilə əlaqədar onun vəkilləri bu barədə vəsatət qaldırıblar, jurnalistin xanımı Sevinc Sadıqova bildirib.

Əfqan Sadıqov 42 gündür ki, həbsxanada aclıq edir. Yeriyə bilmədiyinə görə bu gün məhkəməyə əlil arabasında aparılıb. Bu səbəbdən iki gün əvvəl ailəsilə danışmaq üçün həbsxana xəstəxanasının danışıq məntəqəsinə gedə bilməyib.

Sadıqovanın  sözlərinə görə, məhkəmə prosesi formal olub. "Uşaqlara və mənə bir az söhbət etmək üçün şüşə qəfəsə yaxınlaşmağa  icazə vermədilər.  Əfqanın səhhətinin ağır olmasına baxmayaraq, onu buraxmadılar. Ötən həftə həbsxana həkimi deyib ki, Əfqanın qanında şəkər çox aşağı düşüb. Hər an yuxuya gedə və oyanmaya bilər", - Sadıqova deyib.

Onun sözlərinə görə, Əfqan Sadıqova sığınacaq verilməsindən imtina ilə bağlı noyabrın 11-nə məhkəmə iclası təyin edilib.

* Əfqan Sadıqov 2023-cü ilin dekabrında ailəsilə birlikdə Gürcüstana gedib. İyulda onu Gürcüstandan Türkiyəyə buraxmayıblar, deyiblər ki, ancaq  Azərbaycana qayıda bilər.

Avqustda Sadıqov Azərbaycanın sorğusu əsasında həbs edilib. Bakıda onu təhdid yoluyla tələb etməkdə ittiham edirlər və ekstradisiyanı tələb edirlər. Əfqan Sadıqov həbs olunmasına və ona sığınacaq verilməsindən imtina edilməsinə etiraz olaraq sentyabrın 21-dən aclıq edir. Oktyabrın 8-də aclıq nəticəsində vəziyyəti pisləşib və həbsxana xəstəxanasına köçürülüb.