Əhalinin Şuşaya qayıdışı başlayıb

32 il əvvəl Şuşanı Ermənistan silahlı qüvvələri tərəfindən işğalı zamanı məcburi şəkildə evlərini tərk edən sakinlərin birinci qrupu doğma şəhərə qayıdıb.

Mayın 10-da Azərbaycan prezidenti İlham Əliyevin iştirakı ilə ilk yaşayış kompleksinin açılışı olub.

Yaşayış kompleksində ilk olaraq 20 ailə, o cümlədən 88 nəfər yerləşib.

23 dördmərtəbəli binadan ibarət yaşayış kompleksi 8 hektar ərazidə inşa edilib. 450 mənzildən, o cümlədən 28 ədəd  birotaqlı, 195 ikiotaqlı, 190  üçotaqlı, 30 dördotaqlı və 7 beşotaqlı mənzildən ibarətdir.

Müvafiq olaraq 300 və 500 mənzildən ibarət ikinci və üçüncü yaşayış kompleksinin tikintisi planlaşdırılır.

Şuşa 8 may 1992-ci ildə erməni qoşunları tərəfindən işğal edilmişdi.

2020-ci il 44 günlük müharibə zamanı, noyabrın 8-də şəhər işğalçılardan azad edilib. Müharibə başa çatdıqdan dərhal sonra şəhər infrastrukturunun və tarixi abidələrin bərpasına başlanılıb.