Ekspert: �Rusiya Azərbaycanı silahlandırmaqda davam edir�

Bakı/28.06.17/Turan: Bir neçə gün əvvəl Azərbaycanın Müdafiə Nazirliyi çoxlu sayda silah və döyüş texnikasının ölkəyə gətirildiyi barədə məlumat yayıb.

Alınan silahlar Rusiyadan Bakı limanına gətirlib. Müdafiə Nazirliyi texnikanın adını açıqlamasa da, hərbi ekspertlərin "Xrizantema-S" tank əleyhinə raket komplekslərinə, 9P 157-4 komanda-qərargah maşınına və raketlərə baxış keçirdiyi əks olunan fotoşəkillər dərc edib. Ötən ay da Rusiya Azərbaycana böyük partiya hərbi texnika göndərib.

Rusiyanın müttəfiq olmayan Azərbaycanı öz müttəfiqi Ermənistana qarşı bu qədər silahlandırmasının səbəbi nədir?

"Biz Rusiyadan "Xrizantema-S" kompleksinin daxil olduğu ilk belə texnika partiyasını hələ 2015-ci ildə almışıq", deyə Turan-a hərbi ekspert Üzeyir Cəfərov bildirib.

"Sadəcə olaraq, onun gəlişi cəbhə xəttində bir il əvvəlki aprel hadisələri ilə eyni vaxta təsadüf edib. Həmin vaxt ermənilərə "Xrizantema-S" və İsraildən alınmış tank əleyhinə idarə olunan Spayk raketləri ilə güclü zərbə endirilmişdi.

İndi səs-küy yaranıb ki, döyüş əməliyyatları bərpa edilərsə, Ermənistanın mühəndis qurğularının, tanklarının və piyadalarının xilas olmaq üçün heç bir şansı yoxdur. Çünki "Xrizantema"nın "ağır texnikanı və qurğuları aşkar edən, daha sonra isə məhv edən radar sistemi var.

Rusiyanın hərbi ekspertləri, o cümlədən Aleksandr Xramçixin hesab edir ki, Azərbaycan indi hərbi əməliyyatları sonuncu dəfə bərpa etməyi qərara alıb, buna görə də Rusiyadan hərbi texnika alır. Belə deyil. Azərbaycan buna qədər də Rusiyadan, İsraildən, Pakistandan, Türkiyədən, Ukraynadan silah alırdı və bu, o demək deyil ki, tezliklə müharibə başlayacaq. Bəli, torpaqlarımızın işğal altında olduğunu nəzərə alsaq, döyüş əməliyyatları hər zaman başlaya bilər, danışıqlar nəticə verməsə, biz hərbi əməliyyatlara əl atmağa məcbur olacağıq, idarə olunan raketlərdən də bu əməliyyatlarda istifadə olunacaq. Bir neçə gün əvvəl gətirilən silah partiyası sonuncu deyil. Rusiya ilin sonuna qədər Azərbaycana digər döyüş texnikası və silah növləri də göndərməlidir, onlar Azərbaycan Ordusunun sərəncamına keçəcək. Azərbaycan bütün bu silahların pulunu tamamilə ödəyib", deyə Ü.Cəfərov əlavə edib.

"Rusiya sadəcə olaraq silah satmaq istəyir, bu, onun biznesidir", deyə politoloq Hikmət Hacızadə Turan-a bildirib.

"Rusiyaya pul lazımdır. Silah ticarətinin strateji hissəsi isə alan ölkənin satan ölkəyə bağlı olmasıdır, çünki ona ehtiyat hissələri və s. lazım olacaq. Buna görə Rusiya hamıya həvəslə silah satır.

Azərbaycanın pulu olanda o, uzaq xaricdən silah alırdı, Rusiyadan isə qonşunun könlünü almaq üçün, dost olduğunu göstərmək üçün silah alırdı. Rusiya Azərbaycanın bu silahdan istifadə edərək Ermənistanla müharibəyə başlayacağından ehtiyatlanmır, çünki o, bu prosesə nəzarət edə bilər. Azərbaycan Rusiyanın xeyir-duasını almadan Ermənistana qarşı hücuma keçərsə, Rusiya mütləq müdaxilə edəcək, başımızın üzərində rəmz olmayan hərbi təyyarələr uçacaq. Zənnimcə, Azərbaycan hələlik müharibəyə başlamaq niyyətində deyil, daha sonra nə olacağı məlum deyil.

Ermənistan, əlbəttə ki, Azərbaycana böyük partiya silahların göndərilməsinə etiraz edəcək, Ermənistan ictimaiyyəti bundan çox narahatdır. Amma, Rusiya onları sakitləşdirməyi bacarır, "narahat olmayın, Azərbaycan müharibəyə başlasa biz onu yatırarıq, biz sadəcə olaraq pul qazanırıq". O, həqiqətən satdığı silahları yatıra bilər, çünki onun daha güclü silahı var. Rusiya əmindir ki, vəziyyətə nəzarət edə və lazım olanda "dayan" deyə bilər. Biz dörd günlük aprel döyüşləri zamanı bunu gördük. O döyüşlər daha uzun çəkə bilərdi, Azərbaycanın bunun üçün imkanı var idi, amma Rusiya "dayan" dedi. Buna görə Azərbaycana satılan silahlara görə Ermənistan və Rusiyanın münasibətləri pozulmayacaq", deyə H.Hacızadə bildirib. -0-