Gürcüstan Əfqan Muxtarlının cinayət işi materiallarını istəyir

Bakı/28.06.17/Turan: "Gürcüstan tərəfi Azərbaycanın hüquq mühafizə qurumlarından jurnalist Əfqan Muxtarlı ilə dindirməyə şərait yaradılmasını tələb edib".

Turan xəbər verir ki, yunun 27-də Gürcüstanın baş prokuroru Irakli Shotadze gürcü jurnalistlərə açıqlamasında belə deyib.

Baş prokuror bildirib ki, ölkəsi Azərbaycan hüquq-mühafizə orqanlarının cavabını gözləyir.

"Gürcüstan Prokurorluğu azərbaycanlı həmkarlarına müraciət edib. Əfqan Muxtarlı ilə bağlı cinayət işinin materialları istənilib", baş prokuror Irakli Shotadze vurğulayıb.

O, qeyd edib ki, qarşı tərəfdən sənəd və sübutları əldə edib öyrəndikdən sonra Gürcüstan tərəfi müvafiq hüquqi qərarlar qəbul edəcək və buna uyğun addımlar da atılacaq.

Jurnalist Ə.Muxtarlı mayın 29-u oturum izini aldığı Gürcüstandan zorla Azərbaycana gətirildiyini deyir. Ə.Muxtarlının bildirməsinə görə, Tbilisidə saxlanarkən ona işgəncə verilib. Sərhədə gətirilərək Azərbaycana təhvil verilib. Onun deməsinə görə, sərhədə cibinə 10 min avro da qoyulub.

Jurnalist Cinayət Məcəlləsinin 315.2-ci maddəsi ilə hakimiyyət nümayəndəsinə müqavimət və ya zor tətbiq etmədə ittiham olunur.--0--

Bundan başqa, ona 318.1, 206.1 maddələr ilə - sərhədi qanunsuz keçmə və qaçaqmalçılığa görə də ittiham irəli sürülüb.