Eldar Həsənovun vəkilləri onun yanına həkim buraxılmasını və barəsindəki qətimkan tədbirinin dəyişdirilməsini xahiş edirlər

Bakı/14.04.21/Turan: Həbsdə olan sabiq baş prokuror və Azərbaycanın Serbiyada keçmiş səfiri Eldar Həsənovun ciddi müalicəyə ehtiyacı var. Bu barədə onun vəkilləri Cəlil Mirzəyev, Valeh Mehraliyev, Adəm Məmmədov, Cavad Cavadovun dövlət başçısına ünvanlanan müraciətində deyilir.

Müraciətdə qeyd edilir ki, son iki ayda Həsənovun vəziyyəti kəskin şəkildə pisləşib və həyatı üçün təhlükə yaranıb.

Müdafiə tərəfin müxtəlif xəstəxanalardan ixtisaslaşmış həkimlərin Eldar Həsənovun saxlanıldığı istintaq təcridxanasına dəvət olunması barədə vəsatətlərinə məhəl qoyulmur. Eyni zamanda, son 6 ildə 7 ağır cərrahi əməliyyatlar keçirən hazırda onurğa problemlərindən iflic ərəfəsində olan, dəhşətli ağrılar keçirən Həsənovun əməliyyat olunması haqqında xahişlər də təmin edilməyib.

Vəkillər dövlət başçısından Həsənovun həyatı üçün təhlükəli durumla bağlı təcili tibbi müdaxilə edilməsinə və bu əsaslarla həbs qətimkan tədbirinin dəyişdirilməsinə kömək etməyi xahiş edirlər.

Baş Prokurorluğun mətbuat xidmətindən Turan agentliyinin soruğusuna cavabda bildiriblər ki, Həsənovun cinayat işi uzrə cinayət-prosessual qanunvericiliyin tələbələrinə uyğun olaraq tam obyektiv va hərtərəfli istintaq aparılı və müdafiə tərəfin vəsatəti əsasında məhkəmə-tibb ekspertizası təyin edilib.

Xatırladaq ki, Azərbaycanın Serbiya və Bosniya və Herseqovinada səfiri vəzifəsində çalışmış Eldar Həsənov 2020-ci il avqustun 13-də Dövlət Təhlükəsizliyi Xidməti (DTX) tərəfindən saxlanılıb. Avqustun 14-də Bakının Səbail rayon Məhkəməsi hakim Azər Tağıyevin sədrliyi ilə Dövlət Təhlükəsizliyi Xidmətinin təqdimatı əsasında Eldar Həsənov barəsində həbs qətimkan tədbiri seçib. O, Cinayət Məcəlləsinin 308.2 (vəzifə səlahiyyətlərindən sui-istifadə etmə) və 308-1.1-ci (büdcə vəsaitlərindən təyinatı üzrə istifadə etməmə) maddələri ilə ittiham olunur.

90-cı illərdə Eldar Həsənov ölkənin baş prokuroru vəzifəsini tuturdu və aydın səbəbləri olmadan vəzifədən azad edilmişdi. Sonradan hökumət dairələri Həsənovun hakimiyyət iddiasında olduğu və müəyyən dairələr tərəfindən Heydər Əliyevin mümkün davamçısı kimi görüldüyü barədə fikir yayılmağa başlamışdı. -0-