Eldar Namazov İlham Əliyevə inanır?

Bakı/20.02.18/Turan: Heydər Əliyevin keçmiş köməkçisi, politoloq Eldar Namazovun rəhbərlik etdiyi "Deportasiya qurbanları" İctimai Birliyi gözlənilmədən 11 aprel növbədənkənar prezident seçkilərində İlham Əliyevi dəstəkləyəcəyini bildirib.

Bu barədə qurumun üzvləri fevralın 19-da Beynəlxalq Mətbuat Mərkəzində azərbaycanlıların Ermənistandan deportasiyasına həsr olunmuş tədbirdə bildiriblər.

1993-cü ildə Xalq Cəbhəsi hökumətində baş nazirin müavini və təhsil naziri postunu tutmuş Firidun Cəlilov hamını 11 aprel seçkilərində İlham Əliyevin namizədliyini dəstəkləməyə çağırıb.

Eldar Namazovun mövqeyi qəti olmasa da İlham Əliyevə dəstək təəssüratı yaradır. O, Turan-ın müxbirilə söhbətində deyib: "Qarşıdakı seçkilərin nəticələri məlumdur. Dəyişiklik olmayacaq və İlham Əliyev prezident qalacaq. Məni ən çox seçkilərdən sonrakı proseslər narahat edir, islahatlar necə olacaq, Qarabağ nizamlanmasında hansı addımlar atılacaq".

Qeyd edək ki, "Deportasiya qurbanları" təşkilatı bir neçə il öncə yaradılıb və aktiv fəaliyyət göstərmir.

E.Namazova gəlincə, 1993-99-cu illərdə Heydər Əliyevin katibliyinə rəhbərlik edib və Ermənistanla təslimçi sülh müqaviləsinin hazırlanması barədə şayiələrin fonunda istefa verib.

Sonra "Azərbaycan naminə" İctimai Forumu yaradıb, "El" Hərəkatını təsis edib, Demokratik Qüvvələrin Milli Şurasının yaradılmasının və 2013-cü il prezident seçkilərində kinodramaturq Rüstəm İbrahimbəyovun namizədliyinin irəli sürülməsinin təşəbbüsçülərindən biri olub.

Sonradan E.Namazov Milli Şuradan uzaqlaşıb, ancaq hökumətyönlü mövqe tutmayıb. -02B-