Eldar Sabiroğlu Siyavuş Novruzovla münasibəti barədə

Bu günlərdə YAP icraçı katibinin müavini Siyavuş Növruzovla keçmiş deputat,  Müdafiə Nazirliyi mətbuat xidmətinin keçmiş rəhbəri Eldar Sabiroğlu arasında söz “atışması” olub.

S.Novruzov E.Sabiroğlunu “xəmirinin belə xəyanətlə yoğrulması”, “mətbuat xidmətinin rəhbəri kimi ermənilərə informasiya ötürməsi” kimi təhqirlərə məruz qoyub.

Bununla bağlı Turan-a açıqlama verən E.Sabiroğlu S.Novruzovun barəsində fikir ifadə etmək arzusunda olmadığını, onunla bağlı nöqteyi-nəzərini bu günlərdə mətbuata kifayət qədər açıq ifadə etdiyini söyləyib.   

E.Sabiroğlu “zincirli adam” dediyi S.Novruzov barədə açıqlama verərək onun səviyyəsinə enmək istəmədiyini deyib. “Görünür, onun böyüyü və saxlayanı Ramiz Mehdiyev haqqında dediklərim “zincirli adam”ı əsəbiləşdirib və belə cavab verir”, - E.Sabiroğlu S.Novruzovun açıqlamasına münasibət bildirib. O, hazırda mətbuata geniş müsahibə vermək fikrində olmadığını deyib. E.Sabiroğlu bu mövqeyini müdafiə üçün “indiki seçki ərəfəsində kimlərinsə qarışıqlıq salaraq kimlərisə hədəfə gətirməklə sıradan çıxarmaq arqumentilə əsaslandırıb. Amma E.Sabiroğlu seçkilərdən sonra geniş açıqlama ilə çıxış edəcəyini bildirib.

Digər tərəfdən, E.Sabiroğlu bu situasiyada R.Mehdiyevdən qorxunun şahidi olduğunu dilə gətirib, hətta mətbuatın belə bu şəxsdən qorxduğunu vurğulayıb. “Mən bu dərəcədə qorxu olduğunu təsəvvür belə etmirdim, hörmət, ehtiram, bir nəfərə olar, o da prezidentin özüdür”,- E.Sabiroğlu qeyd edib.-05B-