Ələsgər Məmmədli və Ruslan İzzətli şübhəli şəxs qismində saxlanılıblar (VİDEO - yeniləndi)

Ələsgər Məmmədli şübhəli şəxs qismində saxlanıldı. Bu barədə vəkil Aqil Layıc bildirib.

«Qaçaqmalçılıqda ittiham edilir. Səhhətində ciddi problemlər -boğazında, düz bağırsağında və prostatında əməliyyət zərurəti tələb edən şişlər var. Bu gün biopsiya üçün həkimə gedərkən saxlanılıb», - vəkil qeyd edib.

Ruslan İzzətlidə eyni ittihamla  şübhəli şəxs qismində saxlanılıb. O ittihamı rədd edir.

* * *

Ələsgər Məmmədlinin mənzilindən 60 min avro “tapılıb”

Ələsgər Məmmədlinin evində axtarış bitib. 60 min avro pul “tapılıb”. Ailə üzvləri pulun onlara məxsus olmadığını, əməliyyatçılar tərəfindən qoyulduğunu deyirlər.

Məmmədli hazırda Bakı şəhər Baş Polis İdarəsində saxlanılır.

Axtarış zamanı Ruslan İzzətlinin evindən də pul “tapılıb”. Onun həyat yoldaşı ayrı otaqda təcrid olunub və axtarış prosesini görməyib.

* * *

Ələsgər Məmmədli və Rüstəm İzzətlinin mənzillərində axtarış aparılır

Saat 14.00 radələrində bu gün səhər saatlarında saxlanılan Ələsgər Məmmədli və Rüstəm İzzətlinin mənzillərində axtarış başlayıb. Bu barədə onların yaxınları məlumat verib.

Yada salaq ki, Məmmədli Toplum TV onlayn resursunun təsisçilərdən biridir, İzzətli isə “Üçüncü Respublika” siyasi platformasının üzvüdür.

* * *

Ələsgər Məmmədli və Ruslan İzzətli saxlanılıb

Tanınmış media eksperti, Toplum Tv-nin təsisçisi Ələsgər Məmmədli bu gün səhər saatlarında mülki geyimli şəxslər tərəfindən saxlanılıb. Onun qohumu Gülzar Məmmədli bildirib ki, bu, saat 11.00 radələrində Məmmədli müayinə olunduğu İstanbul klinikasından çıxarkən saxlanılıb.

Məmmədli maşınına yaxınlaşanda mülki geyimli şəxslər tərəfindən tutularaq başqa maşına mindirilib və naməlum istiqamətə aparılıb.

Bu gün Xətai polisinin binası qarşısında III Platformanın üzvü Ruslan İzzətli də saxlanılıb. Toplum TV-nin baş redaktoru Xədicə İsmayıl bildirib ki, onu qara rəngli avtomobilə mindirərək naməlum istiqamətə aparıblar.

Qeyd edək ki, İzzətli martın 6-da saxlanılsa da, gecə yarısı sərbəst buraxılmışdır.