Əli Həsənov ATƏT-in Minsk Qrupuna təəccüblənir

Dövlət başçısının köməkçisi Əli Həsənov  Azərbaycan ərazilərində dinc yaşayış məntəqələrinin atəşə tutulmasına görə Ermənistanın ünvanına tənqidin olmamasından hiddətlənib.

Ə.Həsənovun cümə günü hökumətyönlü KİV-də yayılan şərhində deyilir ki, Dağlıq Qarabağ münaqişəsinin həlli ilə məşğul olan ATƏT-in Minsk Qrupu, bu quruma daxil olan dövlətlər Ermənistan silahlı birləşmələrinin işğal altında olan Azərbaycan ərazilərindən yaşayış məntəqələrini ağır silahlarla intensiv şəkildə atəşə tutmasına və bunun nəticəsində dinc sakinlərin həlak olmasına heç bir münasibət bildirməyiblər.

“Hazırkı vəziyyətdə bu qurumların susqunluğu belə bir qənaətə gəlməyə əsas verir ki, beynəlxalq təşkilatlar, ələlxüsus da ATƏT-in Minsk Qrupu bütün səylərini Dağlıq Qarabağdakı separatçı qurumun və ona rəhbərlik edən hərbi cinayətkarların təhlükəsizliyinin təmin edilməsinə və mövcud status-kvonun qorunub saxlanmasına yönəldiblər”, - Ə.Həsənov bildirib.

Onun sözlərinə görə, bu, ikili standartların tətbiqi və Azərbaycan xalqına hörmətsizlikdir.

Azərbaycan Ermənistan rəhbərliyinin və bu ölkənin silahlı qüvvələrinin növbəti təxribatlarına, yaşayış məntəqələrinin dağıdılmasına, dinc sakinlərin qətlə yetirilməsinə dözmək niyyətində deyil. 

Beynəlxalq ictimaiyyət bundan sonra da susmaqda davam edərsə Azərbaycan dinc əhalini müdafiə etmək və təxribatlara son qoymaq üçün qətiyyətli tədbirlər görməyə məcbur olacaq”, - Ə.Həsənov bildirib. -02D-