Əli Həsənov: Avropa ölkələrində jurnalistlər həbs olunur...

Bakı/13.01.18/Turan: "Bir sıra xarici dairələr və onların nəzarətində olan beynəlxalq QHT və KİV-lərin Azərbaycanda söz və məlumat azadlığının vəziyyəti ilə bağlı qərəzli və subyektiv iddiaları ATƏT kimi mötəbər beynəlxalq qurumun rəsmi nümayəndələri tərəfindən də heç bir araşdırma aparmadan təkrarlanır".

Azərbaycan prezidentinin ictimai-siyasi məsələlər üzrə köməkçisi Əli Həsənov ATƏT-in media ofisinin rəhbəri Harlem Dezirin Azərbaycanda ifadə azadlığının durumu ilə bağlı açıqlamasını AZƏRTAC-a şərh edərkən belə deyib.

O, vurğulayıb ki, Azərbaycanda söz və məlumat azadlığı təmin edilib.

"Yüzlərlə KİV sərbəst fəaliyyət göstərir, əhalinin 82 faizinin internetə çıxışı var. Buna görə də Azərbaycanda media azadlığının durumundan narahatlıq ifadə etmək, guya KİV-lərin qarşısının alınması, jurnalistlərin işgəncələrə məruz qalması, hüquq müdafiəçilərinin həbs edilməsi və cəzasızlıq mühitinin mövcud olması ilə bağlı iddialar irəli sürmək yanlış mövqedir".

Ə.Həsənovun fikrincə, Azərbaycan hüquqi, demokratik və qanunun aliliyinin təmin olunduğu ölkədir.

"Vəzifəsindən, sosial statusundan asılı olmayaraq hər bir kəs, o cümlədən də qanunları, jurnalist etikasını və normalarını pozan, KİV nümayəndəsi adı altında qeyri-qanuni əməllərlə məşğul olan hər bir şəxs buna görə cavabdehlik daşımalıdır", o, qeyd edib.

Prezidentin köməkçisi iddia edib ki, inkişaf etmiş Avropa ölkələrində jurnalistlərə qarşı dözülməz hallar baş verir, onların fəaliyyəti məhdudlaşdırılır, həbs olunur, insanların öz fikirlərini sərbəst şəkildə ifadə etmək hüququnun qarşısı ən sərt metodlarla alınır.

"Amma təəssüf ki, belə hallar həm beynəlxalq jurnalist təşkilatlarının, həm də ATƏT-in diqqətini cəlb etmir. Hesab edirəm ki, Harlem Dezir və onunla həmrəy olan maraqlı dairələr öz mövqeyində daha balanslı və obyektiv olmalı, Azərbaycana qarşı tendensioz yanaşmaya yol verməməlidirlər".

Ə.Həsənov həmçinin qeyd edib ki, Azərbaycan dövləti söz və məlumat azadlığının daha da inkişaf etdirilməsi ilə bağlı bütün beynəlxalq qurumlar və yerli təşkilatlarla açıq dialoqa hazırdır.

ATƏT-in media ofisinin rəhbəri Harlem Dezir dünən, yanvarın 12-i "Amerikanın səsi"nə açıqlamasında Azərbaycanda ifadə azadlığının durumunu tənqid edib.

O, Azərbaycanda hazırda ən azı yeddi media işçisinin həbsdə olduğunu vurğulayıb.

"Tbilisidə oğurlanmış və saxta ittihamlarla uzun müddətdir həbsdə saxlanılan Əfqan Muxtarlı kimi bəzi jurnalistlərin məhkəmə prosesi davam edir", deyən Dezir 2005-ci ildə qətlə yetirilmiş "Monitor" məcmuəsinin Elmar Hüseynovun, 2011-ci ildə bıçaqlanaraq öldürülmüş yazıçı Rafiq Tağının təqsirkarlarının hələ də həbs edilməməsinə diqqət çəkib.

"Artıq Azərbaycan hakimiyyəti üçün beynəlxalq təşkilatların xəbərdarlıqlarına əməl edib, bütün həbsdə olan jurnalistlərin azad edərək vətəndaş cəmiyyətini dialoqa cəlb etməyin vaxtı çatıb", ATƏT-in media ofisinin rəhbəri bildirib.--0--